Border News Agency
ကျောက်တော်၊ စက်တင်ဘာ ၃၀။
အာရက္ခတပ်တော်(AA)ထိန်းချုပ်ထားတဲ့ ကျောက်တော်မြို့ရှိ အိန္ဒိယဈေးနဲ့ ကစ္ဆပနဒီတံတားအနီးကို စက်တင်ဘာလ၂၈ ရက်နေ့က အာဏာသိမ်းစစ်တပ်ရဲ့ လေကြောင်းတိုက်ခိုက်ခဲ့မှုကြောင့် သေဆုံးသွားခဲ့ရတဲ့အရပ်သားတွေထဲမှာ မူဆလင်လူမျိုးလေးဦး ပါဝင်နေပါတယ်။
အဲဒီမြောက်ဦးမြို့နယ်၊ ပေါင်းတုတ်ကျေးရွာကဦးအာရှုရာမန်ရဲ့သား အသက်လေးဆယ်ငါးနှစ်အရွယ် ဦးညီညီဝင်း၊ဦးမောင်နီရဲ့သားအသက်နှစ်ဆယ့်ငါးနှစ်အရွယ် မောင်ကိုကိုအောင်တို့သေဆုံးခဲ့ကြတာပါ။
အဲဒီအပြင် ကျောက်တော်မြို့နယ်၊တောင်ထောင်ကျေးရွာက ဦးဂူလာဟုဆင်းရဲ့သား အသက်လေးဆယ်အရွယ် ဦးအာယူအာလီ၊ဦးဇော်ယောရဲ့သမီး အသက်သုံးဆယ်ခုနှစ်နှစ်အရွယ်ဒေါ်မသိန်းနု (ခ) အာနုဝါရာတို့သေဆုံးခဲ့တာဖြစ်ပါတယ်။
အဲဒီလေကြောင်း တိုက်ခိုက်မှုကြောင့် မူဆလင်ဆယ်ဦး အပါအဝင် အပြစ်မဲ့အရပ်သားပြည်သူငါးဆယ့်ခုနှစ်ဦးဒဏ်ရာရရှိခဲ့ကြပြီး ဒဏ်ရာရရှိသူတွေထဲမှာ အသက်အန္တရာယ် စိုးရိမ်ရတဲ့ ပြင်းထန်ဒဏ်ရာရသူဆယ့်ခုနှစ်ဦးထိ ပါဝင်နေတာပါ။
အဲဒီလေကြောင်းတိုက်ခိုက်ခံရတဲ့ ကျောက်တော်မြို့မဈေးနဲ့ အနီးဝန်းကျင်ရပ်ကွက်တွေမှာ ထိခိုက်ပျက်စီးမှုတွေ ပြင်းထန်စွာ ကြုံတွေ့ခဲ့ရတာကြောင့် ပြည်သူတွေအတွက် ဆေးဝါးနဲ့အရေးပေါ်အကူအညီတွေလိုအပ်နေပါတယ်။
အာရက္ခပြည်သူ့တော်လှန်ရေးအစိုးရနဲ့ ဒေသကူညီရေးအဖွဲ့တွေက သေဆုံးသူတွေရဲ့ ရုပ်လောင်းတွေကို သင်္ဂြိုဟ်ပေးတာနဲ့ ဒဏ်ရာရသူတွေကို ဆေးကုသပေးရေးလုပ်ငန်းတွေကို ဆက်လက်လုပ်ဆောင်ပေးနေကြပါတယ်။
အာဏာသိမ်းစစ်တပ်ဟာ စာသင်ကျောင်း၊ ဆေးရုံ၊ဈေးနဲ့အရပ်သားပြည်သူတွေ နေထိုင်ရာနေရာတွေကိုရည်ရွယ်ချက်ရှိရှိတိုက်ခိုက်နေမှုကိုပြင်းထန်စွာကန့်ကွက်ရှုတ်ချပြီး တာဝန်ရှိသူတွေကို ထိရောက်စွာလက်တုံပြန်သွားမယ်လို့ အာရက္ခတပ်တော်ကဆိုပါတယ်။
စစ်တပ်ကခုလိုမျိုးစစ်ရေးနဲ့မသက်ဆိုင်တဲ့ အရပ်သားပစ်မှတ်တွေကို စနစ်တကျတိုက်ခိုက်နေတာဟာ ဂျီနီဗာကွန်ဗင်းရှင်း အပါအဝင် နိုင်ငံတကာလူသားချင်းစာနာထောက်ထားမှုဆိုင်ရာဥပဒေတွေကို ပြောင်ပြောင်တင်းတင်းချိုးဖောက်ကာ အဆိုးဝါးဆုံးစစ်ရာဇဝတ်မှုတွေကိုကျူးလွန်နေတာလို့ လူ့အခွင့်အရေးလှုပ်ရှားသူတွေကထောက်ပြကြပါတယ်။
