Border News Agency
အိန္ဒိယ၊ ဇွန် ၅။
အိန္ဒိယနိုင်ငံကိုသွားရောက်ခဲ့တဲ့ ခရီးစဉ်အတွင်း အာဏာသိမ်းစစ်တပ်ခေါင်းဆောင် မင်းအောင်လှိုင်က ဇွန်လ ၄ ရက်နေ့တုန်းက DD သတင်းဌာနနဲ့ တွေ့ဆုံမေးမြန်းခန်းမှာ ပြည်သူ့ကာကွယ်ရေးတပ် (PDF)တွေကို ငြိမ်းချမ်းရေးနဲ့ လုံခြုံရေးအတွက် ဦးစားပေးရှင်းလင်းသွားမယ်လို့ ပြောဆိုလိုက်ပါတယ်။
သူကတော်လှန်ရေးအင်အားစုတွေကို အပိုင်းနှစ်ပိုင်းခွဲပြီး စဉ်းစားမှာဖြစ်သလို PDF တွေကိုတော့ ဦးစားပေးကိုင်တွယ်သွားမယ်လို့ ဆိုပါတယ်။
တိုင်းရင်းသားလက်နက်ကိုင်အဖွဲ့တွေရဲ့ တောင်းဆိုချက်တွေနဲ့ ပတ်သက်လို့လည်း ဖြစ်ချင်တာတွေ လျှောက်ပြောနေမယ့်အစား ဖြစ်နိုင်တာနဲ့ ဖြစ်သင့်တာတွေကိုပဲ လုပ်ဆောင်ရမယ်လို့ ပြောဆိုခဲ့ပါသေးတယ်။
ဒါ့အပြင်အိန္ဒိယနိုင်ငံဘက်က စိုးရိမ်နေတဲ့ နယ်စပ်တည်ငြိမ်ရေးအတွက် အရေးပါတဲ့ ကလေး – တမူးလမ်းကြောင်းကို မိုးမကျခင်ပြန်ဖွင့်ပေးပြီး နယ်စပ်ဂိတ်တွေ ပြန်ဖွင့်နိုင်အောင်ကြိုးပမ်းပေးမယ်လို့လည်း ကတိပေးပြောကြားခဲ့ပါတယ်။
ဒါပေမယ့်မြေပြင်အခြေအနေမှာတော့ အာဏာသိမ်းစစ်တပ်ဟာ ဒေသတည်ငြိမ်ရေးအကြောင်းတွေပြောနေပေမယ့် တနိုင်ငံလုံးအတိုင်းအတာနဲ့ တိုက်ပွဲတွေကပြင်းထန်နေဆဲပဲ ဖြစ်ပါတယ်။
အာဏာသိမ်းစစ်တပ်ဟာ အပြစ်မဲ့အရပ်သားပြည်သူတွေကို ပစ်မှတ်ထားတိုက်ခိုက်နေရုံတင်မကဘဲ မတရားစစ်မှုထမ်းဥပဒေနဲ့ လူငယ်တွေကို အဓမ္မဖမ်းဆီးတာ၊ ပြည်သူတွေကို လူသားဒိုင်းအဖြစ် အသုံးပြုတာစတဲ့ လူ့အခွင့်အရေးချိုးဖောက်မှုတွေကို မြေပြင်မှာ ဆက်တိုက်ကျူးလွန်နေတာဖြစ်ပါတယ်။
