Border News Agency
ထိုင်း၊ ဇူလိုင် ၅။
မြန်မာနိုင်ငံကလာတဲ့ပြောင်းရွှေ့နေထိုင်သူတွေအတွက် ထိုင်းနိုင်ငံသားမဟုတ်သူတွေကိုင်ဆောင်တဲ့ တောင်ပေါ်သားအထောက်အထားကတ်ပြားတွေ တရားမဝင် လိမ်လည်ထုတ်ပေးနေတဲ့ကွန်ရက်တခုကို ထိုင်းအာဏာပိုင်တွေကစီးနင်းခဲ့ပါတယ်။
အဲဒီစစ်ဆင်ရေးအတွင်း ထိုင်းခရိုင်အရာရှိဟောင်းတဦး အပါအဝင်လူဆယ့်တဦးကို ဖမ်းဆီးရမိခဲ့ပြီး ကျန်ရှိနေတဲ့ သံသယရှိသူခြောက်ဦးကိုတော့ ထိုင်းရဲတပ်ဖွဲ့က ဆက်လက်ရှာဖွေနေတယ်လို့ သိရပါတယ်။
အဲဒီကွန်ရက်ဟာ မြန်မာရွှေ့ပြောင်းလုပ်သားတွေကို ထိုင်းအိမ်ထောင်စုစာရင်းထဲ ထည့်ပေးဖို့အတွက် ပွဲစား၊ အိမ်ပိုင်ရှင်တွေနဲ့ပူးပေါင်းကာ ကတ်ပြားတခုရဖို့ တဦးကို ထိုင်းဘတ်ငါးသောင်းအထိ တောင်းခံခဲ့တာဖြစ်ပါတယ်။
အဲဒီကတ်ပြားရသွားသူတွေဟာ နိုင်ငံသားစိစစ်မှုကို စောင့်ဆိုင်းနေသူတွေဖြစ်သွားတာကြောင့် ရဲတပ်ဖွဲ့အနေနဲ့ တရားမဝင်ဝင်ရောက်မှုနဲ့ ဖမ်းဆီးအရေးယူဖို့ ခက်ခဲသွားစေတယ်လို့ဆိုပါတယ်။
အဲဒီအကြောင်းနဲ့ပတ်သက်တဲ့အစိုးရအရာရှိတွေကို ရာထူးကထုတ်ပယ်လိုက်ပြီး တရားမဝင်ထုတ်ပေးထားတဲ့ကတ်ပြားတွေကို ပယ်ဖျက်ကာလိမ်လည်မှုကွန်ရက်တွေကို တနိုင်ငံလုံးအတိုင်းအတာနဲ့ ဆက်လက်နှိမ်နင်းသွားမယ်လို့ သိရပါတယ်။
