Border News Agency
ရသေ့တောင်၊ ဩဂုတ် ၂၅။
အာရက္ခတပ်တော်(AA)ထိန်းချုပ်ထားတဲ့ ရသေ့တောင်မြို့နယ်မှာ အာဏာသိမ်းစစ်တပ်ရဲ့လေကြောင်းမှ ဗုံးကြဲခံရတဲ့နေရာအနီးဝန်းကျင်မှာ နွားတွေတကောင်ပြီးတကောင် သေဆုံးနေတဲ့အကြောင်းရင်းကို စစ်ဆေးနေတယ်လို့ အာရက္ခပြည်သူ့ကျန်းမာရေးဌာန၊ မှုခင်းရေးရာဆေးပညာဌာနခွဲကဩဂုတ်လ ၂၅ ရက်၊ဒီနေ့ထုတ်ပြန်ပါတယ်။
အာဏာသိမ်းစစ်တပ်ရဲ့လေကြောင်းတိုက်ခိုက်မှုကြောင့် ကျရောက်တဲ့ဗုံးသီးတွေအတွင်းပါ ယမ်းတွေဟာမိုးရေနဲ့အတူဘေးပတ်ဝန်းကျင်သို့ ပြန့်နှံ့ရောက်ရှိသွားလေ့ရှိပြီး ယမ်းအဆိပ်သင့်မှုတွေဖြစ်ပွားတတ်ရာ ခုဖြစ်စဉ်မှာလေကြောင်းတိုက်ခိုက်ခံရတဲ့ နေရာတွေအနီးရှိစားကျက်တွေမှာ အစာလွှတ်ကျောင်းတဲ့နွားတွေသေဆုံးနေတာပါ။
အဲဒီနွားတွေသေဆုံးမှုကို ထူးခြားဖြစ်စဉ်နဲ့မသင်္ကာဖွယ်ရာဖြစ်ရပ်အဖြစ် သတ်မှတ်ကာအထူးဂရုပြု စစ်ဆေးနေပြီးသေဆုံးရတဲ့ အဖြေပေါ်ထွက်လာရင် ဆက်လက်အသိပေးသွားမယ်လို့ဆိုပါတယ်။
ဒေသခံပြည်သူတွေအနေနဲ့လည်း အာဏာသိမ်းစစ်တပ်ရဲ့ လေကြောင်းတိုက်ခိုက်ခံရတဲနေရာတွေအနီးတဝိုက်မှ အသီးအနှံနဲ့စားသောက်ဖွယ်ရာတွေကို စားသောက်တာမလုပ်ကြဖို့နဲ့ ဗုံးကြဲခံရတဲ့နေရာတွေမှာ ကျွဲ၊ နွား၊ ဝက်၊ ကြက် စတဲ့ တိရစ္ဆာန်တွေကို လွှတ်ကျောင်းတာမလုပ်ကြဖို့သတိပေးထားတာပါ။
အဲဒီအပြင် အာရက္ခပြည်အတွင်း ခုလိုမျိုးကျွဲ၊ နွား၊တိရစ္ဆာန်တွေသေဆုံးတဲ့ ဖြစ်စဉ်တွေတွေ့ရှိရင် နီးစပ်ရာအုပ်ချုပ်ရေးဌာနတွေနဲ့ DLEPS ဌာနတွေသို့ ချက်ချင်းအကြောင်းကြားကြဖို့လည်း နှိုးဆော်ထားပါတယ်။
