Border News Agency
အရာတော်၊ ဇူလိုင် ၁၅။
စစ်ကိုင်းတိုင်း၊အရာတော်မြို့နယ်မှာ အာဏာသိမ်းစစ်တပ်လေကြောင်းတိုက်ခိုက်လို့ ကိုယ်ဝန်ဆောင်အမျိုးသမီးနဲ့ ကလေးငယ်အပါအဝင် ပြည်သူသုံးဦး သေဆုံးသွားတယ်လို့ ဒေသခံတွေဆီကသိရပါတယ်။
အဲဒီအရာတော်မြို့နယ်၊ကံရင်းကျေးရွာရှိ ဝင်းမိသားစုလက်ဖက်ရည်ဆိုင်နဲ့ အနီးဝန်းကျင်ကို ဇူလိုင်လ ၁၄ ရက်နေ့မှာ အာဏာသိမ်းစစ်တပ်က ဂျိုင်ရိုကော်ပတာတွေနဲ့ ရည်ရွယ်ချက်ရှိရှိတိုက်ခိုက်ခဲ့တာ ဖြစ်ပါတယ်။
အဲဒီလိုတိုက်ခိုက်ခဲ့တာကြောင့် လက်ဖက်ရည်ဆိုင်နဲ့ဝန်းကျင်ကို ဗုံးတွေကျရောက်ပေါက်ကွဲခဲ့ပြီး ကိုယ်ဝန်ဆောင်အမျိုးသမီးတဦးနဲ့ အခြားအမျိုးသမီးတဦးတို့ နေရာမှာတင် သေဆုံးခဲ့ရပါတယ်။
ဗုံးဒဏ်ကြောင့် မိခင်သေဆုံးသွားပြီးနောက် ဝမ်းဗိုက်ထဲက ကလေးငယ်ကို အရေးပေါ်မွေးဖွားပေးဖို့ ကြိုးစားခဲ့ကြပေမယ့် မွေးဖွားချိန်မှာ ကလေးငယ်ဟာ သေဆုံးနေခဲ့ပြီလို့ ဒေသခံတွေက ဆိုကြပါတယ်။
အဲဒီအပြင် ဗုံးစထိမှန်ကာ ဦးခေါင်းပိုင်း ပြင်းပြင်းထန်ထန် ဒဏ်ရာရရှိခဲ့တဲ့ နောက်ထပ်အမျိုးသားတဦးလည်း လက်ရှိမှာအသက်အန္တရာယ် စိုးရိမ်ရတဲ့ အခြေအနေရှိနေတယ်လို့ သိရပါတယ်။
