Border News Agency
နေပြည်တော်၊ ဇူလိုင် ၁၈။
နေပြည်တော်လယ်ဝေးမြို့နယ်နဲ့ရန်ကုန် ဒလမြို့နယ်မှာ ပင်လယ်ပြင်သို့တင်ပို့မယ့် ငွေကျပ် ၂၀ ဘီလီယံကျော်တန်ဖိုးရှိ အိုက်စ်၈၀၀ ကီလိုကျော်ကိုတရားခံတွေနဲ့အတူ ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ဇူလိုင်လ ၁၇ ရက်၊မနေ့ကထုတ်ပြန်ပါတယ်။
အဲဒီလယ်ဝေးမြို့နယ်မှာခြောက်ဘီးယာဉ်တစီးပေါ်မှ ငွေကျပ် ၁၂ ဒသမ ၅ ဘီလီယံတန်ဖိုးရှိ အိုက်စ် ၅၀၀ ကီလိုကို တရားခံ ၂ ဦးနဲ့အတူဇူလိုင်လ ၆ ရက်နေ့မှာဖမ်းဆီးရမိခဲ့တယ်လို့ဆိုပါတယ်။
အဲဒီအပြင်ရန်ကုန်မြို့ မင်္ဂလာဒုံနဲ့ မြောက်ဒဂုံမြို့နယ်တွေမှာ ပူးပေါင်းပါဝင်သူ ၃ ဦးကို ထပ်မံဖမ်းဆီးရမိခဲ့သလို ဇူလိုင်လ ၈ ရက်နေ့မှာလည်း ဒလမြို့နယ်၊ရန်ကုန်မြစ်ကမ်းရှိ စက်လှေတစီးပေါ်မှ ငွေကျပ် ၇ ဒသမ ၇၅ ဘီလီယံတန်ဖိုးရှိအိုက်စ် ၃၁၀ ကီလိုနဲ့အတူ တရားခံ ၁၀ ဦးကို ထပ်မံဖမ်းဆီးရမိခဲ့တယ်လို့ ဆိုပါတယ်။
အဲဒီမူးယစ်ဆေးဝါးတွေကို ရှမ်းပြည်မှ ရန်ကုန်သို့သယ်ဆောင်ပေးသူနဲ့ပင်လယ်ပြင်သို့ တင်ပို့ဖို့ စီမံခန့်ခွဲတဲ့ ဝီလျံထွန်းကုမ္ပဏီပိုင်ရှင် ဝေထွန်း အပါအဝင် အဓိကတရားခံအချို့မှာ လွတ်မြောက်နေဆဲလို့ ဆိုပါတယ်။
အဲဒီဖမ်းဆီးရမိသူတွေကိုမူးယစ်ဆေးဝါးဥပဒေနဲ့ အရေးယူထားပြီး ပိုင်ဆိုင်မှုတွေကိုပြည်သူ့ဘဏ္ဍာအဖြစ် သိမ်းဆည်းနိုင်ဖို့ ငွေကြေးခဝါချမှုတိုက်ဖျက်ရေးဥပဒေနဲ့အရေးယူသွားမယ်လို့ဆိုပါတယ်။
