Border News Agency
ထိုင်း၊ သြဂုတ် ၃။
ထိုင်းနိုင်ငံ၊ ဘန်ကောက်မြို့၊ ဝမ်ထောင်လန်ခရိုင်က လိုင်စင်မဲ့အရက်ဆိုင်တဆိုင်ကို ဩဂုတ် ၂ ရက်၊ မနက်စောစောပိုင်းမှာ ထိုင်းရဲတွေဝင်ရောက်စီးနင်းခဲ့ရာ မူးယစ်ဆေးတွေနဲ့အတူ အသက်မပြည့်သေးသူတဦးအပါအဝင် မြန်မာတဆယ့်တဦး ဖမ်းဆီးခံလိုက်ရပါတယ်။
အဲဒီပရာဒစ်မနူသမ် ၂ လမ်းမှာရှိတဲ့အရက်ဆိုင်ကို ဩဂုတ် ၂ ရက်၊မနက် ၁ နာရီခွဲအချိန်မှာ ရဲတွေဝင်ရှာခဲ့တာဖြစ်ပြီး ဆိုင်ထဲမှာသီချင်းသံအကျယ်ကြီးနဲ့ ကခုန် မူးယစ်နေကြတာကို တွေ့ခဲ့တာပါ။
ရှာဖွေချိန် Ketamine မူးယစ်ဆေးဝါး သုညဒသမငါးဂရမ်နဲ့ သုံးစွဲတဲ့ကိရိယာတွေကိုမိခဲ့သလို လိုင်စင်မရှိဘဲ အရက်၊ ဘီယာတွေ ရောင်းပေးနေတာကိုပါ စစ်ဆေးတွေ့ရှိခဲ့ပါတယ်။
အဲဒီဖမ်းခံရတဲ့မြန်မာ တဆယ့်တဦးထဲမှာ အသက်ဆယ့်ရှစ်နှစ်မပြည့်သေးသူတဦးပါဝင်ပြီး အချို့မှာပတ်စ်ပို့မပါကြဘဲ အားလုံးကိုမူးယစ်ဆေးသုံးမှုနဲ့ အရေးယူထားပါတယ်။
ဆိုင်ပိုင်ရှင် ထိုင်းအမျိုးသားကိုတော့ မူးယစ်ဆေးသုံးခွင့်ပြုမှု၊ အသက်မပြည့်သေးသူကိုဝင်ခွင့်ပေးမှုနဲ့ လိုင်စင်မဲ့အရက်ရောင်းမှုစတဲ့ အမှုပေါင်းများစွာနဲ့ အရေးယူထားပါတယ်။
