Border News Agency
မလေးရှား၊သြဂုတ် ၃။
မလေးရှားနိုင်ငံ၊ဆီလန်ဂေါပြည်နယ်၊ Bandar Mahkota Cheras နယ်မြေမှာ ပူထရာဂျာယာလူဝင်မှုကြီးကြပ်ရေးရုံးချုပ်က ဩဂုတ်လ ၁ ရက်၊ ညနေပိုင်းမှာ အထူးစစ်ဆင်ရေးတခုပြုလုပ်ခဲ့ပါတယ်။
အဲဒီစစ်ဆင်ရေးအတွင်း တရားမဝင် e-PLKS ပွဲစားလုပ်နေတဲ့ မြန်မာတဦးအပါအဝင် အခြားမြန်မာနိုင်ငံသားတွေကို ဖမ်းဆီးလိုက်တယ်လို့ မလေးရှား လူဝင်မှုကြီးကြပ်ရေးဦးစီးဌာန (JIM) ကထုတ်ပြန်ပါတယ်။
ပြီးခဲ့တဲ့ ဇူလိုင်လ ၂၈ ရက်ကတည်းကစတင်ခဲ့တဲ့ စစ်ဆင်ရေးအပြီးမှာ တပ်ဖွဲ့ဝင်တွေဟာ နေအိမ်တလုံးကိုဝင်ရောက်ရှာဖွေရာကနေ တရားမဝင်ပွဲစားလို့ မသင်္ကာရသူ မြန်မာတဦးကိုဖမ်းမိခဲ့တာပါ။
အဲဒီပွဲစားနဲ့ အခြားမြန်မာလေးဦးမှာ ယာယီအလုပ်လုပ်ခွင့်လက်မှတ် (PLKS) ရှိကြပေမယ့် ကျန်တဲ့မြန်မာသုံးဦးမှာတော့ တရားဝင်ခရီးသွားအထောက်အထား မရှိဘူးလို့ ဆိုပါတယ်။
စစ်ဆင်ရေးအတွင်း မြန်မာနိုင်ငံကူးလက်မှတ် ဆယ့်ခြောက်အုပ်၊ အတုလို့ ယူဆရတဲ့ PLKS မိတ္တူတွေ၊ အလုပ်သမားပို့ဆောင်ရေးဆိုင်ရာ စာရွက်စာတမ်းတွေနဲ့ Toyota Yaris ကားတစီးကိုပါ သိမ်းဆည်းရမိခဲ့တာပါ။
အဲဒီဂိုဏ်းဟာ JIM ရဲ့ နိုင်ငံခြားသားအလုပ်သမား စီမံခန့်ခွဲမှုစနစ်ထဲကနေထုတ်ပေးထားတဲ့ PLKS တွေကို ရယူပေးမယ်ဆိုပြီး ပွဲစားလုပ်စားနေတာဖြစ်ကာ ခုနှစ်ဆန်းပိုင်းကတည်းက စတင်လှုပ်ရှားနေတာလို့ဆိုပါတယ်။
အဲဒီဖမ်းဆီးရမိသူအားလုံးကို ဆက်လက်အရေးယူနိုင်ဖို့ ပူထရာဂျာယာလူဝင်မှုကြီးကြပ်ရေးရုံးဆီခေါ်ဆောင်သွားခဲ့ပြီး သက်ဆိုင်ရာလူဝင်မှုကြီးကြပ်ရေးနဲ့ နိုင်ငံကူးလက်မှတ် အက်ဥပဒေပုဒ်မအသီးသီးနဲ့ အရေးယူထားတယ်လို့ဆိုပါတယ်။
