Border News Agency
ကျောက်တော်၊ စက်တင်ဘာ ၃၀။
အာရက္ခတပ်တော်(AA)ထိန်းချုပ်ထားတဲ့ ကျောက်တော်မြို့ကို အာဏာသိမ်းစစ်တပ်ရဲ့လေကြောင်းတိုက်ခိုက်ခဲ့မှုကြောင့် အပြစ်မဲ့အရပ်သားပြည်သူ ငါးဆယ်ဦးထက်မက သေဆုံးခဲ့ရတဲ့ဖြစ်စဉ်အပေါ် ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး Volker Türk က စက်တင်ဘာလ ၃၀ ရက်နေ့မှာ ပြင်းထန်စွာစိုးရိမ်ကြောင်း ထုတ်ပြန်ပါတယ်။
အဲဒီလေကြောင်းတိုက်ခိုက်မှုဟာ စက်တင်ဘာလ ၂၈ ရက်နေ့က ရခိုင်၊ ရိုဟင်ဂျာ၊ ဟိန္ဒူနဲ့ ဒိုင်းနက်စတဲ့ လူနည်းစုအသိုင်းအဝိုင်းပေါင်းစုံရောင်းဝယ်ဖောက်ကားနေကြတဲ့ ဆိုင်ခန်းပေါင်းနှစ်ရာကျော်ရှိတဲ့ဈေးအတွင်း ပြည်သူအများအပြားစုဝေးနေချိန် စစ်တပ်က ဗုံးကြဲခဲ့တာလို့ဆိုပါတယ်။
ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး Volker Türk က ဒီလို အရပ်သားပြည်သူတွေကို ပစ်မှတ်ထားတိုက်ခိုက်တာဟာ အပြည်ပြည်ဆိုင်ရာ လူသားချင်းစာနာထောက်ထားမှုဆိုင်ရာဥပဒေကို ပြောင်ပြောင်တင်းတင်း ချိုးဖောက်နေတာဖြစ်ပြီး စစ်ပွဲဆိုင်ရာနည်းဥပဒေတွေကို လိုက်နာဖို့လိုအပ်တယ်လို့ ဆိုပါတယ်။
အဲဒီအပြင် ကျောက်တော်မြို့ လေကြောင်းတိုက်ခိုက်ခံရမှုဖြစ်ပွားပြီး နာရီပိုင်းအကြာမှာ မလေးရှားအစိုးရက မြန်မာနိုင်ငံသားငါးထောင်နီးပါးကို ပြည်နှင်ဒဏ်ပေးဖို့ပြင်ဆင်နေတဲ့လုပ်ငန်းစဉ်ကိုလည်း ချက်ချင်းရပ်တန့်ပေးဖို့ ကုလသမဂ္ဂ မဟာမင်းကြီးက အရေးပေါ်တောင်းဆိုထားတာပါ။
မြန်မာနိုင်ငံအတွင်းအသက်ဘေးအန္တရာယ်ကြောင့် ထွက်ပြေးတိမ်းရှောင်နေရတဲ့ပြည်သူရာပေါင်းများစွာကို နိုင်ငံတကာဥပဒေနဲ့အညီ ခိုလှုံခွင့်နဲ့အကာအကွယ်ပေးမှုတွေ ထိရောက်စွာဆောင်ရွက်ပေးရမယ်လို့လည်းဆိုပါတယ်။
