Border News Agency

မြောက်ဦး ၊အောက်တိုဘာ ၁၇။

အာရက္ခဒေသအတွင်း စစ်ရေးပဋိပက္ခများ ဆက်ပြင်းထန်နေပြီး အရပ်သားပြည်သူများသည် လေကြောင်းတိုက်ခိုက်မှုအန္တရာယ်နှင့် အမြဲတစေရင်ဆိုင်နေကြရသည်။

အာရက္ခတပ်တော် (AA) ထိန်းချုပ်နယ်မြေများအတွင်း စစ်ဘေးရှောင်များ၊ ကလေးသူငယ်များ၊ သက်ကြီးရွယ်အိုများနှင့် အခြားအကာအကွယ်လိုအပ်နေသူများအတွက် လုံခြုံရေးသည် နေ့စဉ်အသက်ရှင်ရပ်တည်ရေးနှင့်တိုက်ရိုက်သက်ဆိုင်နေသည်။

ထိုအခြေအနေတွင် ရခိုင်ပြည်သူများအတွက် အရေးအကြီးဆုံးလိုအပ်ချက်မှာ လေကြောင်းတိုက်ခိုက်မှုအန္တရာယ်မှ အရပ်သားများကို ကာကွယ်နိုင်မည့် အစီအမံများကို အလေးထားဖော်ဆောင်ခြင်းဖြစ်သည်။

သို့သော် ထိုကဲ့သို့အရေးပေါ်လိုအပ်ချက်များ ရှိနေချိန်တွင်ပင် မြောက်ဦးမြို့နယ်၊ ပေါင်းတုတ်ကျေးရွာအနီးရှိ မြေယာများကို အတင်းအဓမ္မသိမ်းယူနေခြင်းက အာရက္ခအုပ်ချုပ်ရေး၏ ဦးစားပေးမှုများနှင့် ပြည်သူ့ယုံကြည်မှုအပေါ် မေးခွန်းထုတ်စရာဖြစ်လာသည်။

လေကြောင်းရန်ကာကွယ်ရေးသည် စစ်ရေးကိစ္စသက်သက်မဟုတ်

လေကြောင်းရန်ကာကွယ်ရေးဟုဆိုရာတွင် စစ်ရေးနည်းပညာနှင့် လက်နက်စနစ်များကိုသာ ဆိုလိုခြင်းမဟုတ်ပေ။

အရပ်သားပြည်သူများကို ကြိုတင်သတိပေးနိုင်သည့်စနစ်၊ အရေးပေါ်ခိုလှုံနိုင်သည့်နေရာများ၊ ဆေးဝါးနှင့် ကယ်ဆယ်ရေးပစ္စည်းများ၊ ထိခိုက်ဒဏ်ရာရသူများကို အချိန်မီကုသနိုင်မည့် ကျန်းမာရေးစနစ်နှင့် အရေးပေါ်အခြေအနေတွင် လူထုကို လုံခြုံစွာရွှေ့ပြောင်းနိုင်မည့် အစီအစဉ်များလည်း ပါဝင်သည်။

အရပ်သားများကို ကာကွယ်ရန် လိုအပ်သည့် အစီအမံများကို အားဖြည့်တည်ဆောက်ခြင်းသည် အုပ်ချုပ်ရေးအဖွဲ့တစ်ခု၏ အရေးကြီးသော တာဝန်ဖြစ်သည်။

နိုင်ငံတကာ၏ လူသားချင်းစာနာထောက်ထားမှုအကူအညီနှင့် နည်းပညာဆိုင်ရာ ပံ့ပိုးမှုများကို ရရှိနိုင်ရန် ကြိုးပမ်းခြင်းသည်လည်း အရေးပါသည်။

သို့သော် ပြည်သူများ၏ အသက်အန္တရာယ်ကို လျှော့ချရန် အရေးတကြီးလိုအပ်နေချိန်တွင် အုပ်ချုပ်ရေးအာဏာကို အသုံးပြု၍ ပြည်သူပိုင်မြေယာများကို သိမ်းယူနေသည့် အဖြစ်အပျက်များ ပေါ်ပေါက်လာပါက ထိုအုပ်ချုပ်ရေး၏ ရည်ရွယ်ချက်၊ တာဝန်ယူမှုနှင့် ဦးစားပေးမှုများကို ပြည်သူများက မေးခွန်းထုတ်လာမည်မှာ သဘာဝကျသည်။

မြေယာသိမ်းယူမှုနှင့်ပြည်သူ့ယုံကြည်မှု

မြောက်ဦးမြို့နယ်၊ ပေါင်းတုတ်ကျေးရွာအနီး မြေယာများကို အာရက္ခပြည်သူ့တော်လှန်ရေးအစိုးရက သိမ်းယူရန် ကြိုးပမ်းနေပြီး မြေတိုင်းတာခြင်းနှင့် အကွက်ရိုက်ခြင်းများ ပြုလုပ်နေသည်ဟု ဒေသခံများက ပြောဆိုထားကြသည်။

မြေပိုင်ရှင်များကို ကြိုတင်အသိပေးခြင်း၊ သဘောတူညီမှုရယူခြင်းနှင့်သင့်လျော်သောလျော်ကြေးပေးခြင်းတို့ မရှိကြောင်းလည်း ၎င်းတို့ကစွပ်စွဲထားကြသည်။

ဤစွပ်စွဲချက်များသည် လွတ်လပ်စွာ စစ်ဆေးအတည်ပြုရန် လိုအပ်သော်လည်း အလေးအနက်ထား ဖြေရှင်းသင့်သည့် ကိစ္စများဖြစ်သည်။

မြေယာဆိုသည်မှာ စီးပွားရေးတန်ဖိုးတခုတည်းရှိသည့် ပစ္စည်းမဟုတ်ပေ။

ကျေးလက်ပြည်သူများအတွက် မြေယာသည် မိသားစုစားဝတ်နေရေး၊ မျိုးဆက်အလိုက် အမွေဆက်ခံမှု၊ လူမှုဘဝနှင့် အနာဂတ်မျှော်လင့်ချက်တို့၏ အခြေခံဖြစ်သည်။

ထို့ကြောင့် မြေယာသိမ်းယူမှုတခုကို အုပ်ချုပ်ရေးအမိန့်တခုဖြင့်သာ ဖြေရှင်း၍မရပေ။

အထူးသဖြင့် တော်လှန်ရေးအင်အားစုတခုသည် ပြည်သူများ၏ အခွင့်အရေးနှင့် တရားမျှတမှုအတွက် တိုက်ပွဲဝင်နေသည်ဟု ကြေညာထားပါက မိမိထိန်း ချုပ်နယ်မြေအတွင်း ပြည်သူများ၏ ပိုင်ဆိုင်မှုအခွင့်အရေးကိုလည်း လက် တွေ့ကာကွယ်ပေးရမည်ဖြစ်သည်။

ပြည်သူ့ထောက်ခံမှုဆိုသည်မှာ စစ်ရေးအောင်မြင်မှုတခုတည်းဖြင့်တည်ဆောက်၍မရ ပေ။

ပြည်သူများ၏အသက်၊အိုးအိမ်၊မြေ ယာနှင့် ဂုဏ်သိက္ခာကို ကာကွယ်ပေးနိုင်ခြင်းကလည်း အုပ်ချုပ်ရေးတရပ်၏ ယုံကြည်ထိုက်မှုကို ဆုံးဖြတ်ပေးသည်။

ဥပဒေကို ကိုင်စွဲခြင်းနှင့် ဥပဒေအတိုင်း လုပ်ဆောင်ခြင်း

ပေါင်းတုတ်ကျေးရွာအနီး မြေယာသိမ်းယူမှုနှင့်ပတ်သက်၍ ၁၈၉၄ ခုနှစ် မြေသိမ်းအက်ဥပဒေကို အခြေခံဆောင်ရွက်နေကြောင်း ULA/AA ဘက်က ပြောဆိုထားသည်ဟု သတင်းတွင် ဖော်ပြထားသည်။

သို့သော် ဥပဒေတရပ်ကို အခြေခံသည်ဟု ကြေညာခြင်းနှင့် ဥပဒေပါလုပ်ထုံးလုပ်နည်းများကို အမှန်တကယ်လိုက်နာခြင်းတို့သည် မတူညီပေ။

မြေယာသိမ်းယူမှုတခုတွင် သက်ဆိုင်သူများကို အသိပေးခြင်း၊ကန့်ကွက်မှုများကို လက်ခံစိစစ်ခြင်း၊ မြေတန်ဖိုးနှင့် နစ်နာမှုများကို သင့်လျော်စွာအကဲဖြတ်ခြင်း၊ လျော်ကြေးကိစ္စကို ဖြေရှင်းခြင်းနှင့် အငြင်းပွားမှုများကို လွတ်လပ်သော တရားစီရင်ရေးနည်းလမ်းဖြင့် ဖြေရှင်းနိုင်ခြင်းသည် အရေးကြီးသည်။

ထို့အပြင် ၁၈၉၄ ခုနှစ် ဥပဒေကို လက်ရှိအခြေအနေတွင် မည်သို့အသုံးချနိုင်သည်၊ သက်ဆိုင်ရာအာဏာပိုင်များ၏ လုပ်ပိုင်ခွင့်နှင့် မြေပိုင်ရှင်များ၏ အခွင့်အရေးများမှာ မည်သို့ရှိသည်ဆိုသည်တို့ကို သီးခြားဥပဒေရေးရာစိစစ်မှု ပြုလုပ်ရန်လည်း လိုအပ်သည်။

အုပ်ချုပ်ရေးအာဏာကိုင်ဆောင်သူများက ဥပဒေကို မိမိတို့အဆင်ပြေသည့်အခါတွင်သာ ကိုးကားပြီး မိမိတို့နှင့် သဘောမတူသူများ၏ ကန့်ကွက်ခွင့်ကို လက်တွေ့ပိတ်ပင်ပါက တရားဥပဒေစိုးမိုးရေး၏ အဓိပ္ပာယ် ပျောက်ဆုံးသွားနိုင်သည်။

တော်လှန်ရေးအစိုးရတရပ်၏ အားသာချက်သည် လက်နက်အင်အားတွင်သာ ရှိမနေသင့်ပေ။

မိမိကိုယ်တိုင် ချမှတ်ထားသည့် စည်းမျဉ်းများကို မိမိကိုယ်တိုင် လိုက်နာနိုင်ခြင်းကလည်း အဖွဲ့အစည်း၏ တည်ငြိမ်မှုကို ဖော်ပြသည့် အဓိကအချက်ဖြစ်သည်။

မြောက်ဦးကမ္ဘာ့အမွေအနှစ်အိပ်မက်နှင့်လူ့အခွင့်အရေး

မြောက်ဦးသည် ရခိုင်၏ သမိုင်း၊ ယဉ်ကျေးမှုနှင့် ရှေးဟောင်းအမွေအနှစ်များအတွက် အရေးပါသည့် နေရာတခုဖြစ်သည်။

၎င်းကို ယူနက်စကို ကမ္ဘာ့အမွေအနှစ်စာရင်းဝင်နိုင်ရန် ကြိုးပမ်းခြင်းသည် ရခိုင်ပြည်သူများအတွက် ဂုဏ်ယူဖွယ် ရာ ရည်မှန်းချက်တခုဖြစ်နိုင်သည်။

သို့သော် ကမ္ဘာ့အမွေအနှစ်ထိန်းသိမ်းရေးဆိုသည်မှာ ရှေးဟောင်းအဆောက် အအုံများနှင့် သမိုင်းဝင်နေရာများကိုသာ ထိန်းသိမ်းခြင်းမဟုတ်ပေ။

ထိုနေရာများနှင့်ဆက်စပ်နေထိုင်ကြသော လူမှုအသိုင်းအဝိုင်းများ၊၎င်းတို့ ၏ အခွင့်အရေးများနှင့် လူမှုဘဝများကိုလည်း ထည့်သွင်းစဉ်းစားရမည်ဖြစ်သည်။

ထိုအမွေအနှစ်ထိန်းသိမ်းရေးအတွက် စီမံကိန်းတခု အကောင်အထည်ဖော်ရာတွင် ဒေသခံများ၏ ပါဝင်ဆွေးနွေးခွင့်၊ မြေယာပိုင်ဆိုင်မှုအခွင့်အရေး၊ နစ်နာမှုများအတွက် သင့်လျော်သော ဖြေရှင်းပေးမှုနှင့် ပွင့်လင်းမြင်သာမှုတို့ကို လျစ်လျူရှု၍မရပေ။

အမွေအနှစ်တခုကို ကာကွယ်ရန်ဆိုပြီး ထိုဒေသတွင် နေထိုင်သော ပြည်သူများကိုယ်တိုင် မိမိတို့၏မြေယာနှင့်အသက် မွေးဝမ်းကျောင်းအခွင့်အရေးများ ဆုံး ရှုံးရပါက ထိုကဲ့သို့သော ထိန်းသိမ်းရေးလုပ်ငန်း၏ လူမှုရေးတရားမျှတမှုကို မေးခွန်းထုတ်ရမည်ဖြစ်သည်။

မြောက်ဦး၏ကမ္ဘာ့အမွေအနှစ်အိပ်မက် အမှန်တကယ်အောင်မြင်လိုပါက ရှေး ဟောင်းအမွေအနှစ်များကို ကာကွယ် ခြင်းနှင့်ဒေသခံပြည်သူများ၏ အခွင့်အရေးကို လေးစားခြင်းတို့ကို တပြိုင်တည်း ဆောင်ရွက်နိုင်ရမည်။

နိုင်ငံတကာယုံကြည်မှု မည်သို့တည် ဆောက်ရမည်နည်း

အာရက္ခဒေသတွင် လေကြောင်းတိုက်ခိုက်မှုအန္တရာယ်မှ အရပ်သားများကို ကာကွယ်ရန် နိုင်ငံတကာအကူအညီနှင့် လူသားချင်းစာနာထောက်ထားမှုဆိုင်ရာ ပံ့ပိုးမှုများ အထူးလိုအပ်နေချိန် ဖြစ်သည်။

သို့သော် ထိုအကူအညီများ ရရှိရေးတွင် အရေးကြီးသည့်အချက်မှာ အုပ်ချုပ်ရေးအဖွဲ့၏ ရည်ရွယ်ချက်ကောင်းများကို ကြေညာရုံသာမက လက်တွေ့လုပ် ဆောင်ချက်များဖြင့် ယုံကြည်မှုတည် ဆောက်နိုင်ခြင်းဖြစ်သည်။

မြေယာသိမ်းယူမှုများနှင့်ပတ်သက်၍ ပွင့်လင်းမြင်သာသော စုံစမ်းစစ်ဆေးမှုများပြုလုပ်ခြင်း၊မြေပိုင်ရှင်များ၏ တို င်ကြားချက်များကို လွတ်လပ်စွာ လက် ခံခြင်း၊လျော်ကြေးအငြင်းပွားမှုများကို မျှတစွာ ဖြေရှင်းခြင်းနှင့် တာဝန်ရှိသူ များကို တာဝန်ခံစေခြင်းတို့သည် နိုင်ငံ တကာ၏ယုံကြည်မှုကို တည်ဆောက်ရာတွင် အထောက်အကူဖြစ်စေမည်။

နိုင်ငံတကာအကူအညီများကို မျှော်လင့်နေသည့် အုပ်ချုပ်ရေးအဖွဲ့အနေဖြင့် ပြည်သူ့အခွင့်အရေးဆိုင်ရာ စွပ်စွဲချက်များကို ပွင့်လင်းစွာ ဖြေရှင်းပြသနိုင်ရမည်။ သက်သေအထောက်အထားများဖြင့် အမှန်တရားကို ရှာဖွေခြင်းနှင့်မှား ယွင်းမှုရှိပါက ပြုပြင်ခြင်းသည် အဖွဲ့အစည်း၏ ဂုဏ်သိက္ခာကို ကာကွယ်ပေးနိုင်သည်။

နိုင်ငံတကာ၏ ယုံကြည်မှုကို ထိန်းသိမ်းရန်ဆိုသည်မှာ ဝေဖန်မှုများကို တားဆီးခြင်းမဟုတ်ပေ။ဝေဖန်မှုများကို လက်ခံပြီး တာဝန်ယူဖြေရှင်းနိုင်ခြင်းဖြစ်သ ည်။

အာဏာတည်ဆောက်ခြင်းထက် ပြည်သူ့လုံခြုံရေးကို ဦးစားပေးသင့်

စစ်ရေးပဋိပက္ခအတွင်း အုပ်ချုပ်ရေးယန္တရားတည်ဆောက်ခြင်းနှင့် အနာဂတ်ဖွံ့ဖြိုးရေးအတွက် မြေယာစီမံခန့်ခွဲခြင်းတို့သည် အရေးပါနိုင်သည်။

သို့သော် ထိုလုပ်ငန်းများသည် ပြည်သူ့အသက်အန္တရာယ်ကာကွယ်ရေးနှင့် အခြေခံအခွင့်အရေးများကို ထိခိုက်စေသည့်ပုံစံမျိုး မဖြစ်သင့်ပေ။

လက်ရှိအချိန်တွင် ရခိုင်ပြည်သူများအ တွက် လိုအပ်နေသည်မှာ လေကြောင်းတိုက်ခိုက်မှုများမှ အကာအကွယ်ရရှိရေး၊အရေးပေါ်ကျန်းမာရေးစောင့်ရှောက်မှု၊စစ်ဘေးရှောင်များ၏နေထိုင်စားသောက်ရေး၊အခြေခံအဆောက်အအုံများ ပြန်လည်ထူထောင်ရေးနှင့်မိမိတို့ ၏ အိုးအိမ်မြေယာများအပေါ် လုံခြုံစိတ်ချမှုရှိရေးတို့ဖြစ်သည်။

ဤလိုအပ်ချက်များကို ဖြည့်ဆည်းပေးခြင်းနှင့် မြေယာအငြင်းပွားမှုများကို တရားမျှတစွာ ဖြေရှင်းခြင်းတို့သည် တခုနှင့်တခု ဆန့်ကျင်နေသည့် လုပ်ငန်းများမဟုတ်ပေ။

ပြည်သူ့ယုံကြည်မှုကို အခြေခံထားသောအုပ်ချုပ်ရေးတရပ်သည် လုံခြုံ ရေး၊တရားဥပဒေစိုးမိုးရေးနှင့် ဖွံ့ဖြိုးရေးတို့ကို အပြန်အလှန် အားဖြည့်ပေးနိုင်အောင် ဆောင်ရွက်ရမည်ဖြစ်သည်။

မြေယာသိမ်းယူမှုနှင့်ပတ်သက်၍ အမှန်တကယ် မမှန်မကန်လုပ်ဆောင်မှုများ ရှိနေပါက လက်နက်အင်အားဖြင့် အတင်းအကျပ် အကောင်အထည်ဖော်ခြင်းထက် လွတ်လပ်သော စိစစ်မှု၊ ညှိနှိုင်းမှုနှင့် တရားမျှတသော လျော်ကြေးပေးမှုတို့ဖြင့် ဖြေရှင်းသင့်သည်။

ထိုအငြင်းပွားမှုများကို ပိုမိုနက်ရှိုင်းစေခြင်းသည် စစ်ဘေးဒဏ်ခံနေရသော ပြည်သူများအပေါ် ဝန်ထုပ်ဝန်ပိုးအသစ်တခု ထပ်မံတင်ပေးခြင်းသာ ဖြစ်လာနိုင်သည်။

အုပ်ချုပ်ရေးအာဏာကိုင်ဆောင်သူများက ဥပဒေကို မိမိတို့အဆင်ပြေသည့်အခါတွင်သာ ကိုးကားပြီး မိမိတို့နှင့် သဘောမတူသူများ၏ ကန့်ကွက်ခွင့်ကို လက်တွေ့ပိတ်ပင်ပါက တရားဥပဒေစိုးမိုးရေး၏ အဓိပ္ပာယ် ပျောက်ဆုံးသွားနိုင်သည်။

တော်လှန်ရေးအစိုးရတရပ်၏ အားသာချက်သည် လက်နက်အင်အားတွင်သာ ရှိမနေသင့်ပေ။မိမိကိုယ်တိုင် ချမှတ်ထားသည့် စည်းမျဉ်းများကို မိမိကိုယ်တိုင် လိုက်နာနိုင်ခြင်းကလည်း အဖွဲ့အစည်း၏ တည်ငြိမ်မှုကို ဖော်ပြသည့် အဓိကအချက်ဖြစ်သည်။

ပြည်သူကို ကာကွယ်နိုင်ခြင်းကသာ အုပ်ချုပ်ရေး၏အောင်မြင်မှု

ရခိုင်တွင် လေကြောင်းရန်ကာကွယ်ရေးနှင့် အရပ်သားများ၏ လုံခြုံရေးကို အထူးအလေးထားရမည့်အချိန်တွင် မြေယာသိမ်းယူမှုဆိုင်ရာ စွပ်စွဲချက်များ ဆက်ပေါ်ပေါက်နေခြင်းသည် အာရက္ခအုပ်ချုပ်ရေးအတွက် မဖြစ်မနေ ပြန်လည်သုံးသပ်ရမည့် ကိစ္စဖြစ်သည်။

တော်လှန်ရေးတရပ်၏ ရည်မှန်းချက်သည် နယ်မြေကို ထိန်းချုပ်နိုင်ခြင်း၊ အုပ်ချုပ်ရေးရုံးများ တည်ဆောက်နိုင်ခြင်းနှင့် အာဏာကို စုစည်းနိုင်ခြင်းတို့ဖြင့်သာ ပြည့်စုံမသွားပေ။

ထိုနယ်မြေအတွင်း နေထိုင်သော ပြည်သူများ၏ အသက်၊ လွတ်လပ်မှု၊ ပိုင်ဆိုင်မှုနှင့် ဂုဏ်သိက္ခာတို့ကို လက်တွေ့ကာကွယ်ပေးနိုင်ခြင်းကသာ အုပ်ချုပ်ရေး၏ တရားဝင်မှုနှင့် လူထုထောက်ခံမှုကို ရေရှည်တည်တံ့စေမည်ဖြစ်သည်။

အကယ်၍ လေကြောင်းရန်မှ ပြည်သူများကို ကာကွယ်ရန် ကြိုးပမ်းနေသည့် အုပ်ချုပ်ရေးတရပ်ကပင် ပြည်သူများ ၏မြေယာပိုင်ဆိုင်မှုအခွင့်အရေးကို မ ကာကွယ်နိုင်ပါက ပြည်သူများ၏ ယုံ ကြည်မှုကို မည်သို့ရရှိနိုင်မည်နည်း။

အကယ်၍ ကမ္ဘာ့အမွေအနှစ်တခုကို ထိန်းသိမ်းရန် ကြိုးပမ်းနေစဉ် ဒေသခံများ၏အခွင့်အရေးများကို လျစ်လျူရှုမိပါက ထိုအမွေအနှစ်ကို မည်သူတို့အတွက် ထိန်းသိမ်းနေခြင်းဖြစ်မည်နည်း။

ဤမေးခွန်းများသည် အာရက္ခအုပ်ချုပ်ရေးကို တိုက်ခိုက်ရန် ရည်ရွယ်သည့် မေးခွန်းများမဟုတ်ပေ။

ပြည်သူ့တော်လှန်ရေးတရပ်သည် မိမိကြေညာထားသော တရားမျှတမှုနှင့်ပြ ည်သူ့အခွင့်အရေးဆိုင်ရာ ရည်မှန်း ချ က်များကို လက်တွေ့အကောင်အထည် ဖော်နိုင်ခြင်း ရှိ၊မရှိ ပြန်ဆန်းစစ်ရန် လိုအပ်ကြောင်း သတိပေးသည့် မေးခွန်းများဖြစ်သည်။

လေကြောင်းရန်ကာကွယ်ရေးသည် ပြည်သူ့အသက်ကို ကာကွယ်ရန်ဖြစ်ပြီးတရားဥပဒေစိုးမိုးရေးသည် ပြည်သူ့အခွင့်အရေးကို ကာကွယ်ရန်ဖြစ်သည်။

ထိုနှစ်ရပ်စလုံး၏ အဓိကရည်ရွယ်ချက်မှာ ပြည်သူများ၏ လုံခြုံမှုနှင့် ဂုဏ်သိက္ခာဖြစ်သည်။

ပြည်သူကို အမှန်တကယ် ဦးစားပေးသော အုပ်ချုပ်ရေးတရပ်သည် ပြည်သူ့အသက်ကိုသာမက ပြည်သူ့အိုးအိမ်နှင့် မြေယာကိုပါ ကာကွယ်ပေးနိုင်ရမည်ဖြစ်သည်။