Border News Agency
ပုဏ္ဏားကျွန်း ၊အောက်တိုဘာ ၁၅။
အာဏာသိမ်းစစ်တပ်ကမ်းတက်ထိုးစစ်ဆင်သိမ်းယူဖို့ကြိုးစားနေတဲ့ ငပြီကျွန်းတိုက်ပွဲမှာ နှစ်ဘက်အကျအဆုံးများတယ်လို့ မြေပြင်စစ်ရေးသတင်းရင်းမြစ်တွေက အတည်ပြုပြောကြပါတယ်။
အဲဒီငပြီကျွန်းဟာ ကုလားတန်မြစ်ဝမှာတည်ရှိပြီး ကုလားတန်မြစ်ကြောင်းထိန်းချုပ်စိုးမိုးရေးဝင်ပေါက်ဖြစ်တာမို့ နှစ်ဘက်အပြင်းထန်ဆုံးတိုက်ခိုက်နေကြတယ်လို့ ဆိုကြပါတယ်။
“တပ်တော်ကတော့ မြေပြင်ထိတွေ့တိုက်ပွဲမှာအားသာပါတယ်။ ခွေးတွေဖက်ကတော့ လေကြောင်းပစ်ကူတွေအပြင်းထန်းဆုံးလုပ်နေပါတယ်။ နှစ်ဘက်ကျဆုံးတာများပါတယ်။”လို့ မြေပြင်သတင်းရင်းမြစ်တဦးက Border News Agency ကိုပြောပါတယ်။
အဲဒီငပြီကျွန်းကို ကြည်း၊ရေ၊လေပူး ပေါင်းစစ်ဆင်ပြီး အာဏာသိမ်းစစ်တပ်ကကမ်းတက်နိုင်ခဲ့ပေမယ့် အာရက္ခတပ်တော်ရဲ့အပြင်းထန်ဆုံးတိုက်ခိုက်မှုကိုခံနေရတယ်လို့ ဆိုကြပါတယ်။
အဲဒီငပြီကျွန်းတိုက်ပွဲမှာ အာဏာသိမ်းစစ်တပ်လေကြောင်းတိုက်ခိုက်မှုတွေကြောင့် ပြီးခဲ့တဲ့ရက်ပိုင်းက အာရက္ခတပ်တော်မှ ဗိုလ်မှူးနဂါးအပါအဝင်တပ်ဖွဲ့ဝင်တချို့ကျဆုံးသွားတယ်လို့ အာရက္ခတပ်တော်ရဲ့မြေပြင်တပ်ဖွဲ့ဝင်တချို့က အတည်ပြုပြောကြပါတယ်။
အဲဒီဗိုလ်မှူးနဂါးနဲ့အဖွဲ့ဟာ ငပြီကျွန်းကိုကမ်းကပ်လာတဲ့ အာဏာသိမ်းစစ်တပ်ရေတပ်စစ်သင်္ဘောတွေကို ပစ်ခတ်တိုက်ခိုက်ခဲ့ကြတာဖြစ်ပြီး အာဏာသိမ်းစစ်တပ်ရဲ့တိုက်လေယာဥ်အုပ်ဗုံးကြဲတိုက်ခိုက်မှုမှာကျဆုံးသွားခဲ့ကြတာလို့ အာရက္ခတပ်တော်ရဲ့မြေပြင်တပ်ဖွဲ့ဝင်တချို့က အတည်ပြုပြောကြပါတယ်။
အဲဒီငပြီကျွန်းတိုက်ပွဲမှာ အာရက္ခတပ်တော်က တပ်ဖွဲ့ဝင်တဦးကျရင်တဦးအမြန်ပြန်ဖြည့်သလို တပ်ဖွဲ့ဝင်ငါးဦးကျရင်လည်းငါးဦးအမြန်ပြန်ဖြည့်ပြီး အပြင်းအထန်ခုခံကာကွယ်တိုက်ခိုက်နေတယ်လို့ အာရက္ခတပ်တော်ရဲ့မြေပြင်တပ်ဖွဲ့ဝင်တွေက ဆိုကြပါတယ်။
“ခွေးတွေကတော့ ကြည်ရေလေပူးပေါင်းအပြင်းအထန်ပစ်ကူပေးနေပါတယ်။ ကိုယ့်ဖက်ကတော့ မြေပြင်ထိုးစစ်မှာအပြင်းအထန်တိုက်နေတာပါ။ ခွေးလေယာဥ်တွေကတော့ နေ့တိုင်းလာပစ်နေပါတယ်။”လို့ မြေပြင်စစ်ရေးသတင်းရင်းမြစ်တဦးက Border News Agency ကို ပြောပါတယ်။
အဲဒီငပြီကျွန်းတိုက်ပွဲမှာ အာရက္ခတပ်တော်ကစစ်သည်လက်နက်ခဲယမ်းထောက်ပို့နေရာတွေလို့ ယူဆတာတွေအပါအဝင် ကြိမ်ခွေမော်ကိုလည်း အပြင်းအထန်လေကြောင်းတိုက်ခိုက်နေသလို ရေတပ်စစ်သင်္ဘောတွေကလည်း လက်နက်ကြီးပစ်ကူပေးနေတယ်လို့ဆိုကြပါတယ်။
အဲဒီကုလားတန်မြစ်အရှေ့ဖက်ကမ်းပွဲကြည့်တောင်အနီးမှာ အာဏာသိမ်းစစ်တပ်ရေတပ်စစ်သင်္ဘောကြီးတွေ ရပ်တန့်ပစ်ကူပေးနေသလို ငပြီကျွန်းကို အာဏာသိမ်းစစ်တပ်က အလုံးစုံသိမ်းပိုက်ထိန်းချုပ်နိုင်သွားရင် ကုလားတန်မြစ်ကြောင်းထဲကို အာဏာသိမ်းစစ်တပ်ရေတပ်စစ်သင်္ဘောတွေဝင်ရောက်လှုပ်ရှားနိုင်သွားမယ်လို့ ဆိုကြပါတယ်။
အဲဒီအပြင် ကုလားတန်မြစ်ကြောင်းတလျှောက်ကို ရေတပ်စစ်သင်္ဘောတွေပစ်ခတ်စစ်ကူပေးနိုင်ပြီး ကုလားတန်မြစ်ကမ်းဘေးရှိ အရပ်သားပြည်သူတွေနေထိုင်ရာနေရာတွေ ပစ်ခတ်တိုက်ခိုက်ခံရလာနိုင်တယ်လို့ ဆိုကြပါတယ်။
အဲဒီငပြီကျွန်းထိုးစစ်မှာ အာဏာသိမ်းစစ်သားတွေလည်း သေဆုံးဒဏ်ရာများသလို ရေတပ်စစ်သင်္ဘောတွေလည်း ပ စ်ခတ်တိုက်ခိုက်ခဲရတာမို့ အာဏာသိမ်းစစ်တပ်ရေတပ်စစ်သင်္ဘောကြီးတွေ ငပြီကျွန်းအနီးကို ကမ်းမကပ်ရဲကြဘူးလို့ဆိုကြပါတယ်။
