Border News Agency
ကျောက်တော်၊ ဇူလိုင် ၄။
အာရက္ခဒေသက စစ်ဘေးရှောင်ကျောင်းသားလူငယ်တွေဟာ စားဝတ်နေရေးအတွက် အလုပ်လုပ်နေကြရပါတယ်။
စစ်ပွဲတွေစတင်ကတည်းက စစ်ဘေးရှောင်တွေဟာ နိုင်ငံတကာလူသားချင်းစာနာထောက်ထားမှုဆိုင်ရာအကူအညီတွေ မရကြတာမို့ စားဝတ်နေရေးအခက်အခဲတွေနဲ့ ကြုံတွေ့နေကြရပါတယ်။
အဲဒါကြောင့် စစ်ဘေးရှောင်ကျောင်းသားလူငယ်တွေဟာမိသားစုစားဝတ်နေရေးအတွက် အဆင်ပြေသလိုကြုံရာလုပ်ကိုင်နေကြရတယ်လို့ စစ်ဘေးရှောင်တွေကဆိုကြပါတယ်။
“ကုန်ထမ်းရလို့ ပင်ပန်းပြီး။ နေမကောင်းတဲ့နေ့တွေလည်းရှိတယ်။ တနေ့လုပ်တာက နှစ်သောင်းကျော်လောက်ရတယ်။ ဆေးခန်းသွားပြဖို့ ပိုက်ဆံမလုံလောက်ဘူး။ မိသားစုတွေကနယ်မှာနေကြတာ။ အလုပ်ရဖို့မြို့ထက်မှာတယောက်တည်းပြောင်းနေရတာ။ ဆေးခန်းလည်းမပြဖြစ်ဘူး။ မတတ်သာလို့ ဒီအလုပ်လုပ်နေရတာပါ။ အရမ်းကိုပင်ပန်းပါတယ်။ အရင်က အေးဆေးကျောင်းတက်နေခဲ့ရတာ။ ဒီအလုပ်စလုပ်တော့မခံနိုင်ဘူး။ အလေးထမ်းရတာအသက်နဲ့မမျှဘူးလို့ ခံစားရတဲ့အခါလည်းရှိတယ်။” လို့ ကျောက်တော်မြို့နယ်မှ စစ်ဘေးရှောင်ကျောင်းသားလူငယ်တဦးက Border News Agency ကိုပြောပါတယ်။
အာရက္ခစစ်ပွဲစတင်ကတည်းက စစ်ကောင်စီတပ်က လမ်းပန်းဆက်သွယ်ရေးတွေ ဖြတ်တောက်ထားသလို နိုင်ငံတကာလူသားချင်းစာနာထောက်ထားမှုအဖွဲ့တွေကိုလည်း ကန့်သတ်တားမြစ်ထားပါတယ်။
အဲဒီအပြင် စစ်ဘေးရှောင်စခန်းတွေ၊ စာသင်ကျောင်းတွေကိုလည်း စစ်ကောင်စီတပ်က လေကြောင်းတိုက်ခိုက်တာတွေပြုလုပ်နေတာမို့ စစ်ဘေးရှောင်တွေအသက်ရှင်ရပ်တည်ရေးတောင်ခက်ခဲနေတယ်လို့ စစ်ဘေးရှောင်တွေကဆိုကြပါတယ်။
“ပညာရေးကတော့ ရပ်နားလိုက်တယ်။ စားဝတ်နေရေးကပိုအရေးကြီးလို့ပညာရေးကိုနောက်ဆုတ်ထားရတာ။ ခုကမိသားစုစားဝတ်နေရေးအတွက်တယောက်တည်းရုန်းကန်နေရတယ်။ ကျောင်းတက်ခွင့်ရမယ်ဆိုရင် သူငယ်ချင်းတွေနဲ့ ပျော်ပျော်ပါးပါးဆက်တက်ချင်ပါတယ်။” လို့ ပုဏ္ဏားကျွန်းမြို့နယ်မှ စစ်ဘေးရှောင်ကျောင်းသားတဦးက Border News Agency ကိုပြောပါတယ်။
အဲဒီစစ်ဘေးရှောင်လူငယ်တွေဟာ အသက်ဆယ့်ရှစ်နှစ်အောက်ကျောင်းသားတွေဖြစ်ကြပြီး သူတို့တွေဟာကျောင်းဆက်တက်ချင်ကြပေမယ့် မိသားစုစားဝတ်နေရေး၊ အသက်ရှင်ရပ်တည်ရေးအတွက် ကြုံရာလုပ်ကိုင်နေကြရတယ်လို့ ဆိုကြပါတယ်။
အဲဒီစစ်ဘေးရှောင်အများစုဟာ စစ်တွေမြို့နယ်က စစ်ဘေးရှောင်လာကြသူတွေဖြစ်ကြပြီး ပုဏ္ဏားကျွန်း၊ ပေါက်တော စတဲ့မြို့နယ်တွေကလည်း ပါဝင်တယ်လို့ ဆိုကြပါတယ်။
အာရက္ခတပ်တော်ဟာ ပလက်ဝဒေသအပါအဝင် တဆယ့်ငါးမြို့နယ်ကိုထိန်းချုပ်ထားပြီး အာရက္ခပြည်သူ့အစိုးရအဖြစ် အုပ်ချုပ်ရေးယန္တားတွေဖော်ဆောင်နေပါတယ်။
အာရက္ခအစိုးရမှာ ပညာရေးစနစ်ဖော်ဆောင်နေပေမယ့် အခမဲ့ပညာရေးစနစ်ကို မဖော်ဆောင်နိုင်သေးတာမို့ ဆက်လက်ပညာမသင်နိုင်တဲ့စစ်ဘေးရှောင်ကျောင်းသားတွေလည်းရှိနေတယ်လို့ စစ်ဘေးရှောင်တွေကဆိုကြပါတယ်။
