Border News Agency
နယ်သာလန်၊ နိုဝင်ဘာ ၁၉။
ရိုဟင်ဂျာတွေအပေါ် လူမျိုးတုံးသတ်ဖြတ်မှု စွပ်စွဲချက်နဲ့ ပတ်သက်ပြီး အပြည်ပြည်ဆိုင်ရာတရားရုံး (ICJ)က ချမှတ်မယ့် စီရင်ချက်ဟာ နစ်နာသူတွေအတွက် သမိုင်းဝင်မှတ်တိုင်ဖြစ်တာကြောင့် အဖွဲ့ဝင်နိုင်ငံတွေအနေနဲ့ စီရင်ချက်ကိုထိရောက်စွာ အကောင်အထည်ဖော်ကြဖို့ ဦးကျော်မိုးထွန်းကတိုက်တွန်းထားပါတယ်။
နယူးယောက်မြို့မှာ နိုဝင်ဘာလ ၁၈ ရက်က ကျင်းပတဲ့ ကုလသမဂ္ဂ အထွေထွေညီလာခံ တတိယကော်မတီမှာ မြန်မာနိုင်ငံရှိ ရိုဟင်ဂျာတွေနဲ့အခြားလူနည်းစုတွေရဲ့လူ့အခွင့်အရေးအခြေအနေဆိုင်ရာ ဆုံးဖြတ်ချက်အဆိုမူကြမ်းကို အတည်ပြုမဆုံးဖြတ်မီ ခုလိုထည့်သွင်းပြောဆိုခဲ့တာဖြစ်ပါတယ်။
အဲဒီအပြင် ICJ ရဲ့ ဆုံးဖြတ်ချက်တွေကို မြေပြင်မှာ လက်တွေ့ကျတဲ့ အကာအကွယ်ပေးမှုတွေနဲ့ တာဝန်ခံမှုရှိစေရေး လုပ်ဆောင်ချက်တွေအဖြစ် ပြောင်းလဲနိုင်ဖို့ ကုလသမဂ္ဂ အထွေထွေညီလာခံရဲ့ နောက်ဆက်တွဲလုပ်ငန်းစဉ်တွေကို အဖွဲ့ဝင်နိုင်ငံအားလုံးက ထိရောက်စွာပံ့ပိုးပေးကြဖို့လည်း ပြောကြားခဲ့ပါတယ်။
ဥရောပသမဂ္ဂ (EU) နဲ့ အစ္စလာမ်မစ်ပူးပေါင်းဆောင်ရွက်ရေးအဖွဲ့ (OIC) တို့ ပူးတွဲတင်သွင်းတဲ့ အဲဒီဆုံးဖြတ်ချက်အဆိုမူကြမ်းကို နိုဝင်ဘာလ ၁၈ ရက်မှာ မဲခွဲဆုံးဖြတ်ခဲ့ရာ ထောက်ခံမဲ တရာ့နှစ်ဆယ့်ရှစ်မဲ၊ကန့်ကွက်မဲ ခြောက်မဲနဲ့ ကြားနေမဲ သုံးဆယ့်သုံးမဲတို့နဲ့ အတည်ပြုနိုင်ခဲ့ပါတယ်။






