Border News Agency
ဂွ၊ ဒီဇင်ဘာ ၁၃။
အာရက္ခတပ်တော် (AA) ထိန်းချုပ်ထားတဲ့ ဂွမြို့နယ်ကို စစ်ကော်မရှင်တပ်ပြန်လည်သိမ်းယူဖို့ ကြိုးစားနေတယ်လို့ မြေပြင်စစ်ရေးသတင်းရင်းမြစ်တွေက ဆိုကြပါတယ်။
အဲဒီဂွမြို့နယ်၊ မိုင် ၂၀ ရိုးပေါ်ထိ စစ်ကော်မရှင်တပ်ဖွဲ့ဝင်တွေ ရောက်ရှိနေသလို မြို့အနီးပင်လယ်ပြင်မှာလည်း စစ်ကော်မရှင်ရေတပ် စစ်သင်္ဘောသုံးစင်းရောက်ရှိနေတယ်လို့ ဆိုကြပါတယ်။
အဲဒီအပြင် လေကြောင်းပစ်ကူတွေလည်း မကြာခဏပြုလုပ်ပေးနေသလို စစ်ကော်မရှင်ရေတပ်စစ်သင်္ဘောသုံးစင်းကလည်း လက်နက်ကြီးပစ်ကူတွေပေးနေတယ်လို့ မြေပြင်သတင်းရင်းမြစ်တွေက ဆိုကြပါတယ်။
အဲဒါကြောင့် ဂွမြို့နယ်ရှိ စစ်ကော်မရှင်တပ်စခန်းနေရာဟောင်းတွေအနီးကို ဒီဇင်ဘာလ ၁၃ ရက်၊ ဒီနေ့နေ့လည်ကလည်း စစ်ကော်မရှင်တပ်လေကြောင်းတိုက်ခိုက်ခဲ့တယ်လို့ မြေပြင်သတင်းရင်းမြစ်တွေက ဆိုကြပါတယ်။
အဲဒီ ဂွမြို့၊ မြိုမရပ်ကွက်အနီးရှိ စစ်ကော်မရှင်တပ်ရဲ့အမှတ် ၅၆၂ ခြေမြန်တပ်ရင်းနဲ့ အမှတ် ၅၆၃ ခြေမြန်တပ်ရင်းအနီးရှိ တောင်တန်းတွေကို ပစ်ခတ်ခဲ့တာလို့ ဆိုကြပါတယ်။
စစ်ကော်မရှင်တပ်ဟာ ဂွမြို့ကို ပြန်လည်သိမ်းယူဖို့ ဧရာဝတီတိုင်းဒေသကြီးမှာစစ်သည်၊ လက်နက်အင်အားဖြည့်တင်းထားသလို ရေတပ်စစ်သင်္ဘောကြီးတွေမှာလည်း စစ်သည်၊ လက်နက်ဖြည့်တင်းထားပြီး ကမ်းတက်စစ်ဆင်ရေးပြုလုပ်ဖို့ ကြိုးစားနေတယ်လို့ မြေပြင်သတင်းရင်းမြစ်တွေက ဆိုကြပါတယ်။
အဲဒီ ဂွမြို့နယ်ဟာ ဧရာဝတီတိုင်းဒေသကြီးနဲ့ နယ်နိမိတ်ချင်းထိစပ်နေပြီး ဂွမြို့နယ်ကို ပြီးခဲ့တဲ့ ၂၀၂၄ ခုနှစ်၊ ဒီဇင်ဘာ လ ၂၈ ရက်နေ့က အာရက္ခတပ်တော် အပြီးသတ်သိမ်းပိုက် ထိန်းချုပ်ထားပါတယ်။
အာရက္ခတပ်တော်ထိန်းချုပ်ထားတဲ့ မြို့နယ်တချို့ကို စစ်ကော်မရှင်တပ် လေကြောင်းတိုက်ခိုက်တာတွေ နေ့စဥ်ရက်ဆက်ပြုလုပ်နေပြီးအကြမ်းဖက်ချေမှုန်းရေး စစ်ဆင်ရေးကို လိုအပ်သလို ဆက်လုပ်သွားမယ်လို့ စစ်ကော်မရှင်တပ်က ဒီဇင်ဘာလ ၁၂ ရက်၊ မနေ့ကထုတ်
ပြန်ထားပါတယ်။
အဲဒါကြောင့် အာရက္ခတပ်တော်ထိန်းချုပ်ထားတဲ့ ရသေ့တောင်၊ ပုဏ္ဏားကျွန်း၊ ပေါက်တော၊ မြောက်ဦး၊ ဂွ၊ ကျောက်ဖြူ စတဲ့မြို့နယ်တွေကို လေကြောင်းတိုက်ခိုက်တာတွေ၊ ရေတပ်စစ်သင်္ဘောကြီးတွေက လက်နက်ကြီးပစ်ခတ်တာတွေ ပြုလုပ်နေပါတယ်။
