Border News Agency
ရန်ကုန်၊ အောက်တိုဘာ ၄။
မလေးရှားနိုင်ငံလူဝင်မှုကြီးကြပ်ရေး ထိန်းသိမ်းရေးစခန်းတွေမှာ ဖမ်းဆီးခံထားရတဲ့ထဲက မြန်မာနိုင်ငံသားတထောင့်လေးရာကျော်ကို အာဏာသိမ်းစစ်တပ်ရဲ့ စစ်သင်္ဘောတွေသုံးစီးနဲ့ ပြန်လည်ခေါ်ဆောင်လာခဲ့ရာ အောက်တိုဘာလ ၄ ရက်၊ဒီနေ့မနက်ပိုင်းမှာ ရန်ကုန်မြို့သို့ရောက်ရှိလာပါတယ်။
အဲဒီမြန်မာနိုင်ငံသားတွေကို မလေးရှားနိုင်ငံဆိုင်ရာမြန်မာသံရုံးနဲ့ စစ်သံရုံးတို့ကလွှဲပြောင်းယူခဲ့တာဖြစ်ပြီး စက်တင်ဘာလ ၂၉ ရက် ညပိုင်းက မလေးရှားနိုင်ငံ လူမွတ်ဆိပ်ကမ်းမှ ရန်ကုန်မြို့သို့ထွက်ခွာလာခဲ့ကြတာဖြစ်ပါတယ်။
ပြန်လည်ပို့ဆောင်ခံရသူတွေမှာ မလေးရှားမှာ တရားမဝင်နေထိုင်မှုနဲ့ အခြားစည်းကမ်းချက်တွေ ချိုးဖောက်မှုကြောင့် ပြစ်ဒဏ်ကျခံပြီးနောက် ထိန်းသိမ်းခံထားရသူတွေပါဝင်ပြီး၊ ရန်ကုန်သို့ရောက်ရင် သက်ဆိုင်ရာနေရပ်အသီးသီးသို့ ပြန်လည်ပို့ဆောင်မယ်လို့ အာဏာသိမ်းစစ်တပ်ကဆိုပါတယ်။
အာဏာသိမ်းစစ်တပ်က ပြည်တော်ပြန်ခေါ်ဆောင်ရေးခေါင်းစဉ်နဲ့ ပြန်လည်ခေါ်ယူနေပေမယ့်လည်း မြေပြင်မှာ ပြည်တွင်းသို့ ပြန်လည်ရောက်လာတဲ့ လူငယ်လူရွယ်တွေမှာ အာဏာသိမ်းစစ်တပ်ရဲ့ စစ်မှုထမ်းဥပဒေ အတင်းအဓမ္မကျင့်သုံးခံရမယ့် ဘေးအန္တရာယ်နဲ့ ရင်ဆိုင်နေကြရပါတယ်။
ခုလိုမလေးရှားအစိုးရက မြန်မာနိုင်ငံသားတွေကို အာဏာသိမ်းစစ်တပ်ဆီ ပြန်လည်လွှဲပြောင်းပေးနေတဲ့အစီအစဉ်အပေါ် ကုလသမဂ္ဂ အပါအဝင် နိုင်ငံတကာလူ့အခွင့်အရေးအဖွဲ့အစည်းတွေကလည်း အပြင်းအထန်ကန့်ကွက်ဝေဖန်နေကြပါတယ်။
