Border News Agency
နမ့်ဆန်၊အောက်တိုဘာ ၄။
တအာင်းပြည်၊ နမ့်ဆန်မြို့အဝင်ပန်စပိန်လမ်းမှာ မန္တလေးကနေမောင်းနှင်လာတဲ့ခရီးသည်တင်ယာဉ်တစီး တိမ်းမှောက်ခဲ့တာကြောင့် အမျိုးသမီးတဦးသေဆုံးခဲ့ပြီးနှစ်ဦးဒဏ်ရာရရှိခဲ့ပါတယ်။
အဲဒီခရီးသည်တင်ယာဉ်ဟာ အောက်တိုဘာလ ၂ ရက်၊နေ့လည် ၁၂ နာရီခွဲအချိန်ခန့်က နမ့်ဆန်မြို့အဝင်လက်ဖက်စက်ရုံအောက် ပန်စပိန်လမ်းကုန်းအတက်မှာ မတက်နိုင်ဘဲ နောက်ပြန်လိမ့်ကျကာ လမ်းဘေးချောက်အတွင်းသို့ ထိုးကျတိမ်းမှောက်ခဲ့တာဖြစ်ပါတယ်။
ယာဉ်တိမ်းမှောက်မှုကြောင့် ယာဉ်ပေါ်ပါခရီးသည်ကိုးဦးထဲက အသက်ငါးဆယ်အရွယ်အမျိုးသမီးတဦး နောက်စေ့ထိခိုက်ဒဏ်ရာရရှိပြီး ဆေးရုံမှာသေဆုံးသွားခဲ့သလို ကျန်အမျိုးသားတဦးနဲ့ အမျိုးသမီးတဦးတို့လည်း ဒဏ်ရာအနည်းငယ်ရရှိခဲ့ပါတယ်။
အခင်းဖြစ်ပွားရာနေရာကို ပလောင်ပြည်နယ်လွတ်မြောက်ရေးတပ်ဦး (PSLF/TNLA) ရဲ့ မြို့နယ်ရဲတပ်ဖွဲ့က သွားရောက်စစ်ဆေးမှုတွေပြုလုပ်ခဲ့ပါတယ်။
ပြီးခဲ့တဲ့ ဩဂုတ်လ ၂၀ ရက်နေ့ကလည်း မိုင်းလုံမြို့နယ်၊လွယ်ခမ်းကျေးရွာအနီးမှာ မန္တလေးသို့မောင်းနှင်လာတဲ့ ကုန်တင်ယာဉ်တစီးတိမ်းမှောက်ခဲ့တာကြောင့် အမျိုးသားနှစ်ဦးထိခိုက်ဒဏ်ရာရရှိခဲ့ပါသေးတယ်။
