Border News Agency
ပဲခူး၊ ဇန်နဝါရီ ၉။
ပဲခူးတိုင်း၊ အုတ်တွင်းမြို့နယ်၊ ညောင်ခြေထောက်၊ ကျွဲပွဲကြား စည်ပင်သာကျေးရွာမှာတပ်စွဲထားတဲ့ စစ်ကော်မရှင်တပ်ဂိတ်စခန်းကို တော်လှန်ရေးတပ်ဝင်ရောက်တိုက်ခိုက်ခဲ့တယ်လို့ ပြည်သူ့ကာကွယ်ရေးတပ်မတော်က ဇန်နဝါရီလ ၉ ရက်၊ မနေ့ ထုတ်ပြန်ပါတယ်။
အဲဒီအမှတ်၂ စစ်ဆင်ရေးနယ်မြေ၊ ပဲခူးတိုင်းစစ်ဌာန စစ်တောင်းမြစ်ဝှမ်းဒေသ အောင်မြင်စစ်ဆင်ရေးအဖြစ် တောကျွဲအင်းမြို့အပါအဝင် ရန်ကုန် – မန္တလေးလမ်းဟောင်းပေါ်ရှိ ကျေးရွာတွေမှာ တပ်စွဲထားတဲ့စစ်ကော်မရှင်တပ်ဂိတ်စခန်းကို တော်လှန်ရေးတပ်ဝင်ရောက်တိုက်ခိုက်ခဲ့တာလို့ဆိုပါတယ်။
ကျောက်တံခါးမြို့နယ်၊ သာယာကုန်းမြို့၊ မီးရထားလမ်းတံတားမှာ အထိုင်ချတပ်စွဲထားတဲ့ကင်းစခန်းအပါအဝင် စစ်ကော်မရှင်တပ်စခန်းဆယ့်လေးခုကို တိုက်ခိုက်ခဲ့တယ်လို့ဆိုပါတယ်။
အဲဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင် ငါးဆယ်ဦးထက်မနည်းသေဆုံးခဲ့ပြီး အများအပြားထိခိုက်ဒဏ်ရာရရှိခဲ့သလို လက်နက်ခဲယမ်းအမြောက်အများ သိမ်းဆည်းရမိခဲ့တယ်လို့ဆိုပါတယ်။
တောကျွဲအင်းမြို့ကို တော်လှန်ရေးတပ်တွေထိန်းချုပ်နိုင်ခဲ့ပြီးနောက် စစ်ကော်မရှင်ရဲ့ အုပ်ချုပ်ရေးယန္တရားအဆောက်အအုံတွေ၊ ရွေးကောက်ပွဲကော်မရှင်ရုံးနဲ့ နယ်မြေရဲစခန်းတို့ကို မီးရှို့ရှင်းလင်းခဲ့ပြီး မြို့ကိုလည်း ခေတ္တခဏထိန်းချုပ်ခဲ့တယ်လို့ဆိုပါတယ်။
အဲဒီတောကျွဲအင်းမြို့ နယ်မြေရဲစခန်းမှာ စစ်ကော်မရှင်က မတရားဖမ်းဆီးချုပ်နှောင်ထားတဲ့ ပြည်သူရှစ်ဦးကိုလည်း ပြည်သူ့ကာကွယ်ရေးတပ်မတော်မှ လွှတ်ပေးနိုင်ခဲ့ပြီး ညောင်လေးပင်မြို့နဲ့ ပိန်းဇလုပ်မြို့ကြားရှိ ရန်ကုန် – မန္တလေးလမ်းဟောင်းမှာလည်း လုံခြုံရေးဆိုင်ရာ စစ်ဆေးဆောင်ရွက်တာတွေပြုလုပ်ခဲ့တယ်လို့ဆိုပါတယ်။
စစ်ဆင်ရေးကို အမှတ်၂ စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ ၂၃ ကွပ်ကဲမှုအောက်ရှိ အမှတ် ၃၅၀၂ တပ်ရင်း၊ ဗျူဟာ၂၄ ကွပ်ကဲမှုအောက်ရှိ P27803 အာဠာဝကတပ်ရင်း၊ P23503 ဒေါင်းဖြူတပ်ရင်း၊ P29903 နဂါးနီတပ်ရင်း၊ ဗျူဟာ ၂၅ ကွပ်ကဲမှုအောက်ရှိ အမှတ် ၃၇၀၂တပ်ရင်း၊ P29914 အထူးကွန်မန်ဒိုတပ်ရင်း၊ ဗျူဟာ ၂၆ပူးပေါင်းတပ်ဖွဲ့နဲ့ အုတ်တွင်းမြို့နယ်ပကဖ၊ ဖြူးမြို့နယ်ပကဖတို့ ပူးပေါင်းတိုက်ခိုက်ခဲ့တယ်လို့ဆိုပါတယ်။
ကျောက်တံခါးမြို့နယ်၊ သာယာကုန်းမြို့၊ မီးရထားလမ်းတံတားမှာ အထိုင်ချတပ်စွဲထားတဲ့ စစ်ကော်မရှင်တပ်စခန်းကိုလည်း ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း ၉ မှ ပူးပေါင်းစစ်ဆင်ရေးအနေနဲ့ တိုက်ပွဲဖော်ဆောင်ခဲ့တယ်လို့ဆိုပါတယ်။
စစ်တောင်းမြစ်ဝှမ်းဒေသ အောင်မြင်စစ်ဆင်ရေးအတွင်း တော်လှန်ရေးတပ်ဖွဲ့များဘက်မှ ရဲဘော်တချို့ထိခိုက်ဒဏ်ရာရရှိခဲ့တယ်လို့ဆိုပါတယ်။
အဲဒီအမှတ်၂စစ်ဆင်ရေးနယ်မြေအတွင်း စစ်ဆင်ရေးတွေကို တိုးမြှင့်ဆောင်ရွက်သွားမှာဖြစ်ပြီး ပြည်သူတွေအနေလည်း စစ်ကော်မရှင်တပ်စခန်းတွေအနီးဝန်းကျင်ကိုမလိုအပ်ပဲ သွားရောက်တာတွေမပြုကြဖို့၊ စစ်ရေးသတိနဲ့နေထိုင်သွားလာကြဖို့ အသိပေးထားပါတယ်။
