Border News Agency
ကျောက်ဖြူ၊ ဇန်နဝါရီ ၁၅ ။
အာရက္ခတပ်တော် (AA) နဲ့ စစ်ကော်မရှင်တို့တိုက်ပွဲဖြစ်ပွားနေတဲ့ ကျောက်ဖြူမြို့နယ်မှာ စစ်ကော်မရှင်တပ်ရဲ့စစ်သင်္ဘောတွေက လက်နက်ကြီးပစ်ခတ်လို့ စစ်ဘေးရှောင်နှစ်ဦးသေဆုံးသွားခဲ့ပါတယ်။
အဲဒီ ကျောက်ဖြူမြို့နယ်၊ သဖန်းချောင်းရွာထဲကို ဇန်နဝါရီလ ၁၄ ရက်၊ မနက် ၁၀ နာရီအချိန်ခန့်က စစ်ကော်မရှင်တပ်ရဲ့စစ်သင်္ဘောတွေက ရွယ်ရည်ချက်ရှိရှိလက်နက်ကြီးသုံးလုံး ပစ်ခတ်ခဲ့တယ်လို့ဆိုပါတယ်။
အဲဒီလို ပစ်ခတ်ခဲ့တာကြောင့် လယ်တဲထဲခိုလှုံနေတဲ့ စစ်ရှောင်လင်မယားနှစ်ဦး သေဆုံးသွားခဲ့ပါတယ်လို့ ဒေသခံတွေကဆိုကြပါတယ်။
အဲဒီအသက်သုံးဆယ့်လေးနှစ်အရွယ် ဦးကျော်ဝင်းထွန်းနဲ့ ဇနီးဖြစ်သူအသက်သုံးဆယ်အရွယ် ဒေါ်ခင်လင်းစိုးတို့ သေဆုံးသွားခဲ့ပါတယ်။
အဲဒီသေဆုံးသွားသူနှစ်ဦးကို ဇန်နဝါရီလ ၁၄ ရက်၊ မနေ့က ရွာသူရွာသားတွေ သဖန်းချောင်းရွာသင်္ချိုင်းမှာ ကောင်းကောင်းမွန်မွန်သင်္ဂြိုဟ်ပေးခဲ့ကြတယ်လို့ ဆိုကြပါတယ်။
စစ်ကော်မရှင်တပ်ဟာ ကျောက်ဖြူအပါအဝင် အာရက္ခတပ်တော်ထိန်းချုပ်ထားတဲ့မြို့တွေကို စစ်သင်္ဘောတွေက လက်နက်ကြီး၊ လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။
လူနေထူထပ်တဲ့ အရပ်သားပြည်သူတွေနေထိုင်ရာနေရာ၊ စာသင်ကျောင်း၊ ဆေးရုံ၊ ဆေးခန်းနဲ့ သာသနိကအဆောက်အအုံတွေကို စစ်ကော်မရှင်တပ် ရည်ရွယ်ချက်ရှိရှိ ရေကြောင်း၊ လေကြောင်းကမှု ပြုလုပ်နေတယ်လို့ ဆိုပါတယ်။
အဲဒါကြောင့် ပင်လယ်ကမ်းနီးမြို့၊ ရွာတွေက မိဘပြည်သူတွေဟာ စစ်ကော်မရှင်တပ်ရေကြောင်း၊ လေကြောင်းတိုက်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။
