Border News Agency
နေပြည်တော်၊ ဇန်နဝါရီ ၂၈။
သေဆုံးနိုင်ခြေလေးဆယ်ရာခိုင်နှုန်းကနေ ခုနှစ်ဆယ့်ငါးရာခိုင်နှုန်းအထိမြင့်မားတဲ့ နီပါး (Nipah Virus) ဗိုင်းရပ်စ် အန္တရာယ်နဲ့ပတ်သက်ပြီး ကျန်းမာရေးဝန်ကြီးဌာနအရေးပေါ် သတိပေးနှိုးဆော်ချက်တွေ ထုတ်ပြန်လိုက်ပါတယ်။
အဲဒီဒီဗိုင်းရပ်စ်ဟာ ကုသဆေးမရှိသေးတဲ့အတွက် နယ်စပ်ဒေသက ပြည်သူတွေအနေနဲ့ အထူးသတိထားကြဖို့ လိုအပ်နေတာပါ။
ဒီဗိုင်းရပ်စ်ဟာ အိမ်နီးချင်းအိန္ဒိယနိုင်ငံ ကီရာလာပြည်နယ် (Kerala) နဲ့ အနောက်ဘင်္ဂလားပြည်နယ် (West Bengal) တွေမှာ ကူးစက်သေဆုံးမှုတွေ မကြာခဏဖြစ်ပွားလေ့ရှိတာကြောင့် မြန်မာနိုင်ငံသားတွေ၊ အထူးသဖြင့် နယ်စပ်ချင်းထိစပ်နေတဲ့ ဒေသခံတွေအနေနဲ့ ရောဂါကူးစက်မလာအောင် ကြိုတင်ပြင်ဆင်မှုတွေ လုပ်ဆောင်သင့်တယ်လို့ ဆိုပါတယ်။
အဲဒီနီပါးဗိုင်းရပ်စ်ဟာ လင်းနို့ကိုက်ထားတဲ့ အသီးအနှံတွေ၊ လင်းနို့ရဲ့တံတွေးနဲ့ဆီးကတစ်ဆင့် လူကိုကူးစက်နိုင်သလို ရောဂါရှိတဲ့တိရစ္ဆာန်တွေနဲ့ ထိတွေ့မိရာကလည်း ကူးစက်နိုင်ပါတယ်။
ဒါ့အပြင် ရောဂါရှိသူနဲ့နီးကပ်စွာထိတွေ့ရင်လည်း လူအချင်းချင်းကူးစက်ပြန့်ပွားနိုင်တဲ့ အန္တရာယ်ရှိနေပါတယ်။
ရောဂါကူးစက်ခံရရင် ပြင်းထန်စွာဖျားတာ၊ ခေါင်းကိုက်တာ၊ လည်ချောင်းနာတာ၊ ချောင်းဆိုးတာ၊ အသက်ရှူရခက်ခဲတာ၊ ကြွက်သားတွေနာကျင်တာနဲ့ အန်တာ၊ မူးဝေတာတွေ ခံစားရနိုင်ပါတယ်။
တကယ်လို့ ရောဂါပိုပြင်းထန်လာရင်တော့ စိတ်ရှုပ်ထွေးတာ၊ ဦးနှောက်ရောင်တာနဲ့ ဝက်ရူးပြန်သလိုမျိုး တက်တာတွေအထိဖြစ်ပွားပြီး အသက်အန္တရာယ်စိုးရိမ်ရပါတယ်။
လက်ရှိအချိန်အထိ နီပါးဗိုင်းရပ်စ်အတွက် သီးသန့်ကာကွယ်ဆေးနဲ့ ကုသဆေး (Specific Treatment) မရှိသေးတာကြောင့် ကြိုတင်ကာကွယ်တာကသာ အထိရောက်ဆုံးနည်းလမ်းဖြစ်ပါတယ်။
ဒါကြောင့်ပြည်သူတွေအနေနဲ့ လက်ကိုဆပ်ပြာနဲ့ မကြာခဏစင်ကြယ်အောင် ဆေးကြောဖို့နဲ့ တစ်ကိုယ်ရေသန့်ရှင်းရေးကို အလေးထားဖို့တိုက်တွန်းထားပါတယ်။
ကာကွယ်ရေး နည်းလမ်းတွေအနေနဲ့ လင်းနို့ကိုက်ထားတဲ့ အသီးအနှံတွေကို လုံးဝ (လုံးဝ) မစားဖို့၊ ဖျားနာနေသူတွေနဲ့ နီးကပ်စွာနေထိုင်တာကိုရှောင်ကြဉ်ဖို့နဲ့ လူနာကိုပြုစုရပါက Mask ၊ လက်အိတ်စတဲ့ အကာအကွယ်ပစ္စည်းတွေကို စနစ်တကျဝတ်ဆင်ဖို့ ကျန်းမာရေးဌာနတွေက အကြံပြုထားပါတယ်။
ဒါ့အပြင် ရောဂါဖြစ်ပွားနေတဲ့ဒေသတွေကို မလိုအပ်ဘဲခရီးမသွားဖို့နဲ့ အဲဒီဒေသတွေက ပြန်လာသူတွေထဲမှာ သံသယဖြစ်ဖွယ်လက္ခဏာရှိပါက ကျန်းမာရေးဌာနကို ချက်ချင်းအကြောင်းကြားဖို့ လိုအပ်ပါတယ်။
မိမိတို့ဆီမှာ ရောဂါလက္ခဏာခံစားရရင်လည်း နီးစပ်ရာဆေးရုံ၊ ဆေးခန်းတွေကို အမြန်ဆုံး သွားရောက်ပြသသင့်သလို နီပါးဗိုင်းရပ်စ်ဟာကူးစက်နှုန်းက ကိုဗစ်လောက်မမြန်ပေမယ့် သေဆုံးနှုန်းကတော့ အဆပေါင်းများစွာပိုမြင့်မားပါတယ်။
ဒါကြောင့် ပြည်သူတွေအနေနဲ့ သစ်သီးဝလံတွေကို စားသုံးတဲ့အခါ လင်းနို့ကိုက်ရာ ပါ၊ မပါ သေချာစစ်ဆေးဖို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
