Border News Agency
မြဝတီ၊ ဇန်နဝါရီ ၂၈။
မြဝတီ – ရွှေကုက္ကိုလ်နယ်မြေမှာ အွန်လိုင်းလောင်းကစားနဲ့ လိမ်လည်မှု (Online Scam) တွေမှာပါဝင်ခဲ့တဲ့ ပြည်ပနိုင်ငံသားနှစ်ဆယ့်နှစ်ဦးကို မြန်မာ – ထိုင်း အမှတ် ၂ ချစ်ကြည်ရေးတံတားကနေတဆင့် သက်ဆိုင်ရာနိုင်ငံတွေကို ပြန်လည်လွှဲပြောင်းပေးလိုက်ပါတယ်။
အဲဒီလိုလွှဲပြောင်းပေးလိုက်တဲ့သူတွေထဲမှာ အီသီယိုးပီးယား၊ တောင်အာဖရိက၊ နီပေါနဲ့ နိုင်ဂျီးရီးယားအပါအဝင် နိုင်ငံပေါင်းဆယ်နိုင်ငံက နိုင်ငံသားတွေပါဝင်ပါတယ်။
ဒီလိုလွှဲပြောင်းတာကို ဇန်နဝါရီလ ၂၇ ရက်၊ မနေ့ကပြုလုပ်ခဲ့တာဖြစ်ပြီး မြန်မာဘက်က ခရိုင်အုပ်ချုပ်ရေးမှူးနဲ့ လဝကတာဝန်ရှိသူတွေ တက်ရောက်ခဲ့တယ်လို့ စစ်ကော်မရှင်တပ်ထုတ်ပြန်ထားတာပါ။
အဲဒီအပြင်ထိုင်းနိုင်ငံအခြေစိုက် နီပေါသံရုံးနဲ့တခြားနိုင်ငံစုံက သံရုံးကိုယ်စားလှယ်တွေ၊ ထိုင်းလူဝင်မှုကြီးကြပ်ရေးအဖွဲ့တွေက လာရောက်လက်ခံခဲ့ကြပါတယ်။
အဲဒီပြီးခဲ့တဲ့ ၂၀၂၅ ခုနှစ်ကနေအခုအချိန်အထိ မြဝတီနယ်စပ်မှာဖမ်းဆီးရမိတဲ့ တရားမဝင်နိုင်ငံသား စုစုပေါင်းတသောင်းလေးထောင့်တရာ့ ခုနှစ်ဆယ့်ရှစ်ဦးရှိခဲ့တယ်လို့ ဆိုပါတယ်။
အဲဒီအထဲက တသောင်းနှစ်ထောင့်ကိုးရာ့ရှစ်ဆယ့်ခုနှစ်ဦးကို ပြည်နှင်ဒဏ်ပေးလွှဲပြောင်းပေးခဲ့ပြီးပြီလို့ သိရပါတယ်။
အဲဒီမြဝတီနဲ့ ရွှေကုက္ကိုလ်ဒေသဟာ နိုင်ငံတကာကစောင့်ကြည့်ခံနေရတဲ့နေရာဖြစ်လို့ အခုလို နိုင်ငံစုံကလူတွေကိုဖမ်းဆီးပြီး သက်ဆိုင်ရာသံရုံးတွေဆီပြန်ပို့ပြတာဟာ စစ်ကော်မရှင်တပ်က နိုင်ငံတကာဖိအားတွေကိုလျှော့ချဖို့ ကြိုးစားတာလို့ နိုင်ငံရေးလေ့လာသူတွေက ဆိုကြပါတယ်။
