Border News Agency
လယ်ဒို၊ ဇန်နဝါရီ ၃၀။
ကေအဲန်ယူ (KNU) အုပ်ချုပ်မှုနယ်မြေ၊ ကော်သူးလေမှာ ၂၀၂၅ ခုနှစ်တနှစ်တာအတွင်း စစ်ကော်မရှင်တပ်စခန်းဆယ့်ခုနှစ်ခုအထိ ပြန်လည်သိမ်းပိုက်နိုင်ခဲ့ပြီး စစ်ရေးအရ အောင်မြင်မှုတွေရရှိခဲ့တယ်လို့ ကေအဲန်ယူ – ဗဟိုက ဇန်နဝါရီလ ၃၀ ရက်၊ ဒီနေ့ထုတ်ပြန်ပါတယ်။
အဲဒီတနှစ်အတွင်းမှာ တိုက်ပွဲပေါင်းနှစ်ထောင့်သုံးရာ့ငါးကြိမ်အထိ ဖြစ်ပွားခဲ့တာပါ။
အဲဒီတိုက်ပွဲတွေအတွင်းမှာ စစ်ကော်မရှင်ဘက်က တပ်ရင်းမှူး၊ ဒုရင်းမှူးတွေအပါအဝင် စုစုပေါင်း တထောင့်ကိုးရာခုနှစ်ဆယ့်လေးဦးသေဆုံးခဲ့ပြီး တထောင့်ခြောက်ရာငါးဆယ့်ငါးဦး ဒဏ်ရာရခဲ့ပါတယ်။
အဲဒီအပြင် ထောက်ပို့ယာဉ်လေးဆယ့်နှစ်စီးကို ဖျက်ဆီးနိုင်ခဲ့သလို အတင်းအဓမ္မ စုဆောင်းခံထားရတဲ့ စစ်ကော်မရှင်တပ်ဖွဲ့ဝင် နှစ်ရာ့တဆယ့်လေးဦး ဟာလည်းလက်နက်ချ အလင်းဝင်ခဲ့ပါတယ်။
တော်လှန်ရေးပူးပေါင်းတပ်ဖွဲ့တွေဘက်မှာတော့ KNLA၊ KNDO နဲ့ ပူးပေါင်းရဲဘော် တရာ့ရှစ်ဦး နိုင်ငံအတွက်အသက်ပေးဆပ်ခဲ့ရပြီး သုံးရာ့ရှစ်ဦးဒဏ်ရာ ရရှိခဲ့ပါတယ်။
ကေအဲန်ယူအနေနဲ့ ပြည်သူ့လွတ်မြောက်ရေးအတွက် မလျှော့တဲ့ဇွဲနဲ့ တိုက်ပွဲဝင်ခဲ့ကြတဲ့ ဒီသူရဲကောင်းရဲဘော်တွေကို အစဉ်အမြဲအသိအမှတ်ပြု ဂုဏ်ပြုသွားမယ်လို့ ဆိုပါတယ်။
