Border News Agency
ကမ္ဘောဒီယား၊ ဇန်နဝါရီ ၃၀။
ကမ္ဘောဒီးယားနိုင်ငံမှာ တရားမဝင်နေထိုင်သူတွေနဲ့ အွန်လိုင်းလိမ်လည်မှု (ကျားဖြန့်) မှာ ပါဝင်ပတ်သက်နေသူ မြန်မာနိုင်ငံသားခုနှစ်ရာ့နှစ်ဆယ့်ကိုးဦးကို နေရပ်ပြန်ပို့လိုက်တယ်လို့ ကမ္ဘောဒီးယားလူဝင်မှုကြီးကြပ်ရေးဌာနက ဇန်နဝါရီလ ၂၉ ရက်၊ မနေ့ကထုတ်ပြန်ပါတယ်။
အဲဒီမြန်မာနိုင်ငံသားတွေကို ဇန်နဝါရီလ ၂၃ ရက်ကနေ ၂၆ ရက်နေ့အတွင်းမှာ အထူးလေယာဉ်နဲ့ပြန်ပို့ခဲ့တာဖြစ်ပြီး အဲဒီထဲမှာ အမျိုးသမီးနှစ်ရာ့တဆယ့်ခုနှစ်ဦးပါဝင်ပါတယ်။
အဲဒီပြန်ပို့ခံရသူတွေဟာ ပတ်စပို့မရှိဘဲ တရားမဝင်နေထိုင်တာတွေအပြင် ဆိုက်ဘာရာဇဝတ်မှုတွေမှာ ပါဝင်ပတ်သက်နေတာကို စစ်ဆေးတွေ့ရှိခဲ့တာပါ။
ကမ္ဘောဒီးယားအစိုးရရဲ့ တင်းကျပ်တဲ့ဥပဒေအရ ဒေသတွင်းဆိုက်ဘာရာဇဝတ်မှုတွေကိုတိုက်ဖျက်ဖို့ အခုလိုအစီအမံတွေ လုပ်ဆောင်ခဲ့တာလို့ ဆိုပါတယ်။
လူဝင်မှုကြီးကြပ်ရေးဌာနရဲ့ ပြောကြားချက်အရ အခုလိုပြန်ပို့ပေးတာဟာ အွန်လိုင်းလိမ်လည်မှု ကွန်ရက်တွေမှာ လှည့်စားခံရတဲ့သားကောင်တွေကို ကူညီပေးတာဖြစ်သလို သူတို့ရဲ့ လွတ်လပ်မှုကိုပြန်ရစေဖို့အတွက် ဦးစားပေးဆောင်ရွက်ခဲ့တာလို့ ဆိုပါတယ်။
ကမ္ဘောဒီးယားအေဂျင်စီအနေနဲ့ နိုင်ငံတွင်းမှာ ဥပဒေစိုးမိုးရေးကိုခြွင်းချက်မရှိ ဆက်လက်ဆောင်ရွက်သွားမှာဖြစ်ပြီး တရားမဝင်နေထိုင်သူတွေ နေရပ်ကိုဘေးကင်းစွာ ပြန်နိုင်ဖို့အတွက် အခုလိုလုပ်ဆောင်တာဖြစ်တယ်လို့ ဆိုပါတယ်။
