Border News Agency
မက္ကဆီကို၊ ဇွန် ၁၂။
၂၀၂၆ ခုနှစ်ကမ္ဘာ့ဖလား ဘောလုံးပြိုင်ပွဲကြီးကို မက္ကဆီကိုနိုင်ငံ၊ မက္ကဆီကိုစီးတီးရှိ ပြန်လည်မွမ်းမံထားတဲ့ Azteca အားကစားကွင်းမှာ ပရိသတ်ပေါင်း ၈၀,၀၀၀ ကျော်နဲ့အတူ ခမ်းနားသိုက်မြိုက်စွာ ဖွင့်လှစ်လိုက်ဖြစ်ပါတယ်။
အဲဒီဖွင့်ပွဲအခမ်းအနားမှာတော့ နာမည်ကျော် အဆိုတော် Shakira၊ Burna Boy နဲ့ J Balvin တို့က ဖျော်ဖြေတင်ဆက်ခဲ့ကြပြီး ပြိုင်ပွဲရဲ့ တရားဝင်သီချင်းဖြစ်တဲ့ ‘Dai Dai’ သီချင်းနဲ့အတူ ပရိသတ်တွေကို ဖျော်ဖြေခဲ့ကြပါတယ်။
၁၉၇၀ နဲ့ ၁၉၈၆ ခုနှစ်တွေက ကမ္ဘာ့ဖလားဖွင့်ပွဲတွေကို လက်ခံကျင်းပခဲ့ဖူးတဲ့ ဒီ Azteca အားကစားကွင်းဟာ အခုဆိုရင် သုံးကြိမ်တိုင်တိုင် လက်ခံကျင်းပပေးတဲ့ ပထမဆုံး အားကစားကွင်းအဖြစ် စံချိန်တင်လိုက်ပါပြီ။
အမေရိကန်၊ မက္ကဆီကိုနဲ့ ကနေဒါနိုင်ငံတို့ ပူးပေါင်းကျင်းပတဲ့ ဒီပြိုင်ပွဲဟာ သမိုင်းတလျှောက် အကြီးမားဆုံး ကမ္ဘာ့ဖလားပြိုင်ပွဲဖြစ်ပြီး အသင်းပေါင်း ၄၈ သင်း ပါဝင်ယှဉ်ပြိုင်ကြမှာ ဖြစ်ပါတယ်။
အဲဒီပြိုင်ပွဲကို လာမယ့် ဇူလိုင် ၁၉ ရက်နေ့မှာ အမေရိကန်နိုင်ငံ၊ နယူးဂျာစီမှာ ကစားမယ့် ဗိုလ်လုပွဲအထိကျင်းပသွားမှာဖြစ်ပြီး စုစုပေါင်း ဝင်ငွေအမေရိကန်ဒေါ်လာ ၁၃ ဘီလီယံအထိ ရရှိဖို့ ခန့်မှန်းထားပါတယ်။
ဒီပွဲအတွက် မက္ကဆီကိုနဲ့ တောင်အာဖရိကတို့ရဲ့ အဖွင့်ပွဲစဉ်ကို စတင်ကစားခဲ့ပေမယ့် အားကစားကွင်းအပြင်ဘက်မှာတော့ ကမ္ဘာ့ဖလားကျင်းပတဲ့ ကုန်ကျစရိတ်တွေ၊ လုံခြုံရေး တင်းကျပ်လွန်းတာတွေနဲ့ ဒေသခံတွေရဲ့ နေထိုင်မှုအပေါ် ထိခိုက်မှုတွေအတွက် ဆန္ဒပြမှုတွေလည်း ဖြစ်ပေါ်ခဲ့ပါတယ်။
ဒီပြိုင်ပွဲကြီးဟာ တလတာလုံး ဘောလုံးလောကရဲ့ အာရုံစိုက်မှုအောက်မှာ မက္ကဆီကိုစီးတီးကိုရောက်ရှိနေမှာဖြစ်ပြီး ကမ္ဘာတဝှမ်းက ဘောလုံးဝါသနာရှင်တွေအတွက်တော့ စိတ်လှုပ်ရှားစရာကာလတခု စတင်လိုက်ပြီပဲဖြစ်ပါတယ်။
