Border News Agency
သံတွဲ၊ ဩဂုတ် ၂၂။
အာရက္ခတပ်တော် (AA)ထိန်းချုပ်ထားတဲ့၊ သံတွဲမြို့နယ်နဲ့ ဂွမြို့ နယ်ကို အာဏာသိမ်းစစ်တပ်လေကြောင်းတိုက်ခိုက်လို့ အရပ်သား ၁ ဦးသေဆုံးပြီး ၂၂ ဦးဒဏ်ရာရသွားတယ်လို့ အာရက္ခတပ်တော် (AA)ကထုတ်ပြန်ပါတယ်။
အဲဒီငပလီမြို့မှာ အာဏာသိမ်းစစ်တပ်စခန်းချတပ်စွဲခဲ့တဲ့ တပ်ရင်းနေရာဟောင်းနဲ့ စစ်ရှောင်နေထိုင်ရာနေရာတွေကို ဩဂုတ်လ ၂၁ ရက်နေ့၊ မနက် တနာရီမှ ၃နာရီအချိန်အထိ စစ်တပ်ရဲ့ဂျက်တိုက်လေယာဉ်အုပ်စုလိုက် ဗုံးအလုံးရေတရာခန့် ကြဲချတိုက်ခိုက်ခဲ့တာပါ။
အဲဒီလိုလေယာဉ်အုပ်စုလိုက်တိုက်ခိုက်ခဲ့တာကြောင့် ငပလီမြို့အတွင်းစစ်ရှောင်နေကြတဲ့ အရပ်သား ၁ ဦး သေဆုံးပြီး ၁၄ ဦးဒဏ်ရာရသွားခဲ့ပါတယ်။
အဲဒီအပြင် ဂွမြို့နယ်၊ ညောင်ချောင်းကျေးရွာကိုလည်း စစ်တပ်ဂျက်တိုက်လေယာဉ်တစီးနဲ့ နှစ်ကြိမ်ဗုံးကြဲချတိုက်ခိုက်ခဲ့တာကြောင့် စစ်ရှောင်တွေအပါအဝင် ၈ ဦးဒဏ်ရာရသွားခဲ့ပြီး လူနေအိမ်တွေလည်းပျက်စီးသွားခဲ့ပါတယ်။
အာဏာသိမ်းစစ်တပ်ဟာ ခုရက်ပိုင်းအတွင်းအာရက္ခတပ်တော်ထိန်းချုပ်နယ်မြေတွေကို လေကြောင်းတိုက်ခိုက်တာတွေ ပိုလုပ်လာတာကြောင့် ပြည်သူတွေအနေနဲ့ အာဏာသိမ်းစစ်တပ်ရဲ့ လေကြောင်းနဲ့ ရေကြောင်းအန္တရာယ်ကို သတိထားကြဖို့ အာရက္ခတပ်တော်ကထပ်ပြီးအသိပေးထားပါတယ်။
