Border News Agency
ဘန်ကောက်၊ ဩဂုတ် ၂၃။
ထိုင်းနိုင်ငံ၊ဘန်ကောက်မြို့ ဒင်းဒန်းခရိုင်မှာရှိတဲ့တိုက်ခန်းငယ်တခုမှာ အသက်ငါးနှစ်ကနေ ဆယ့်ငါးနှစ်အရွယ် မြန်မာကလေးငယ်ခြောက်ဆယ်လေးဦးကို အိမ်ထောင်စုစာရင်းသွင်းထားတာကိုတွေ့ရှိရရာကနေ နိုင်ငံခြားသားတွေကို မှတ်ပုံတင်ပြုလုပ်ပေးနေတဲ့ လိမ်လည်မှုကွန်ရက်တခုပေါ်ပေါက်လာခဲ့ပါတယ်။
အဲဒီဖြစ်စဉ်ဟာ အမျိုးသမီးတဦးက ကလေးသူငယ်ထောက်ပံ့ကြေးလျှောက်ထားဖို့ ခရိုင်ရုံးကိုသွားချိန် သူ့ရဲ့ညီမဖြစ်သူအိမ်ထောင်စုစာရင်းမှာ မြန်မာကလေးငယ်တွေအများအပြားပါဝင်နေတာကို တာဝန်ရှိသူတဦးက မေးမြန်းရာမှ စတင်သိရှိခဲ့ရတာပါ။
အဲဒီနောက် သက်ဆိုင်ရာအာဏာပိုင်တွေက ဒင်းဒန်းရှိတိုက်ခန်းတွေကို ဝင်ရောက်ရှာဖွေခဲ့ရာမှာ တိုက်ခန်းတွေအတွင်းနိုင်ငံခြားသား ကလေးငယ်တထောင့်လေးရာခြောက်ဆယ်ရှစ်ဦးမှတ်ပုံတင်ထားတာကို ထပ်မံ တွေ့ရှိခဲ့ရပါတယ်။
နိုင်ငံခြားသားတွေ တရားဝင် အလုပ်လုပ်နိုင်ဖို့နဲ့ပန်းရောင်ကတ်ရရှိဖို့အတွက် အိမ်ရှင်တွေ၊ပွဲစားတွေနဲ့ခရိုင်ရုံးဝန်ထမ်းတွေပူးပေါင်းပြီး ငွေကြေးယူကာ အိမ်ထောင်စုစာရင်းသွင်းပေးနေတာဖြစ်ကြောင်း ဖော်ထုတ်နိုင်ခဲ့ပြီး ခရိုင်ရုံးဝန်ထမ်းသုံးဦးအပါအဝင် သံသယရှိသူခုနှစ်ဦးကို ဖမ်းဆီးခဲ့တာပါ။
ဒင်းဒန်းခရိုင်အပြင် ဘန်ကောက်မြို့ခရိုင်ငါးဆယ်အတွင်းရှိ နေအိမ်ပေါင်းတသောင်းကျော်မှာ ပန်းရောင်ကတ်ကိုင်ဆောင်ထားတဲ့ နိုင်ငံခြားသားတသောင်းခြောက်ထောင်ကျော်ကို မှတ်ပုံတင်ထားကြောင်း ဘန်ကောက်မြို့တော်အုပ်ချုပ်ရေးအဖွဲ့က စစ်ဆေးတွေ့ရှိထားပါတယ်။
အဲဒါကြောင့်ပြည်ထဲရေးဝန်ကြီးဌာနနဲ့ ငွေကြေးခဝါချမှုတိုက်ဖျက်ရေးအဖွဲ့တို့က နိုင်ငံတဝှမ်းအထိ ဆက်လက် စုံစမ်းစစ်ဆေးသွားမယ်လို့ဆိုပါတယ်။
