Border News Agency
ထိုင်း၊ ဩဂုတ် ၂၃။
ထိုင်းနိုင်ငံတောင်ပိုင်း နယ်စပ်ပြည်နယ်သုံးခုမှာ ဩဂုတ်လ ၂၂ ရက်၊ညပိုင်းကမီးရှို့တာ၊ ဗုံးခွဲတာနဲ့လက်နက်ကိုင်လုယက်တာတွေ ဆက်တိုက်ဖြစ်ပွားခဲ့လို့ နရာသီဝပ်ပြည်နယ်မှာ ညမထွက်ရအမိန့်ထုတ်ပြန်လိုက်ပါတယ်။
အဲဒီတိုက်ခိုက်မှုတွေကြောင့် နရာသီဝပ်ပြည်နယ်မှာ ဩဂုတ်လ ၂၂ ရက်၊ည ၁၀ နာရီ ၁၅ မိနစ်အချိန်ကနေ ဩဂုတ်လ ၂၃ ရက်၊မနက်၆ နာရီအထိ နေအိမ်ပြင်ပကိုထွက်ခွာခွင့် ပိတ်ပင်လိုက်တာဖြစ်ပါတယ်။
ယလာပြည်နယ်မှာ အုပ်ချုပ်ရေးရုံးဝင်းအတွင်းကယာဉ်တွေနဲ့ ဆက်သွယ်ရေးတာဝါတိုင်တွေ မီးရှို့ခံခဲ့ရသလို၊နရာသီဝပ်ပြည်နယ်မှာလည်း တာယာတွေမီးရှို့ခံရပြီး ပေါက်ကွဲမှုတွေဖြစ်ပွားခဲ့ပါတယ်။
အဲဒီအပြင် ပတ္တာနီပြည်နယ်မှာပစ်ခတ်မှုတွေဖြစ်ပြီး 7-Eleven စတိုးဆိုင်တဆိုင် လက်နက်ကိုင်လုယက်ခံခဲ့ရသလို လမ်းမတွေပေါ်မှာ တာယာတွေမီးရှို့တာနဲ့ သံမှိုတွေကြဲဖြန့်ထားတာတွေလည်းရှိခဲ့ပါတယ်။
အဲဒီနေရာတွေမှာ လုံခြုံရေးတပ်ဖွဲ့ဝင်တွေက စစ်ဆေးမှုတွေဆောင်ရွက်နေပြီး ဒေသခံတွေအနေနဲ့ သတိထားသွားလာကြဖို့နဲ့ မသင်္ကာစရာတွေ့ရင် အာဏာပိုင်တွေဆီ ချက်ချင်းအကြောင်းကြားကြဖို့ သတိပေးထားပါတယ်။
