Border News Agency
ဘင်္ဂလားဒေ့ရှ်၊ဩဂုတ် ၂၃။
ဘင်္ဂလားဒေ့ရှ်နိုင်ငံ၊ တက္ကနာ့ဖ်မြို့နယ်၊ နတ်မြစ်အတွင်း မြန်မာနိုင်ငံဘက်မှ တရားမဝင်ဝင်ရောက်လာတဲ့ မူးယစ်ဆေးဝါးသုံးကီလိုဂရမ်ကို ဘင်္ဂလားဒေ့ရှ် နယ်ခြားစောင့်တပ် (BGB) က ဖမ်းဆီးရမိခဲ့ပါတယ်။
မြန်မာဘက်မှ နတ်မြစ်ကိုဖြတ်ပြီး ဘင်္ဂလားဒေ့ရှ်ကိုမူးယစ်ဆေးဝါးတွေ သယ်ဆောင်လာလာမယ်ဆိုတဲ့သတင်းအရ သြဂုတ်လ ၂၂ ရက်၊မနက်ပိုင်းမှာ BGB တပ်ဖွဲ့ဝင်တွေကစောင့်ကြပ်စစ်ဆေးချိန် သံသယဖြစ်ဖွယ်သစ်သားလှေတစီးကို စစ်ဆေးခဲ့တာဖြစ်ပါတယ်။
BGB တပ်ဖွဲ့ဝင်တွေတားဆီးစစ်ဆေးချိန်မှာ လှေပေါ်ပါလာသူသုံးဦးက မြစ်အတွင်းခုန်ချပြေးလွှားသွားခဲ့ပေမယ့်လည်း မူးယစ်ဆေးဝါးသယ်ဆောင်လာတဲ့ မြန်မာနိုင်ငံသား အသက်ငါးဆယ်အရွယ် မောင်ရှာအလမ်ကိုဖမ်းဆီးရမိခဲ့တာဖြစ်ပါတယ်။
အဲဒီလှေအတွင်း လျှို့ဝှက်သယ်ဆောင်လာတဲ့ မူးယစ်ဆေးဝါးသုံးကီလိုဂရမ်၊ လက်လုပ်သစ်သားလှေတစီးနဲ့ လက်ကိုင်ဖုန်းနှစ်လုံးကို သိမ်းဆည်းရမိခဲ့ပြီး တရားခံကို ဥပဒေအရအရေးယူဖို့ တက္ကနာ့ဖ်ရဲစခန်းသို့ လွှဲပြောင်းသွားမှာဖြစ်ပါတယ်။
