Border News Agency
ဘန်ကောက်၊ ဇွန် ၁၂။
ဘန်ကောက်မြို့မှာ မူးယစ်ဆေးဝါးတွေ ဖြန့်ဖြူးနေတဲ့ဂိုဏ်းကြီးတခုကို ဖော်ထုတ်နိုင်ခဲ့ပြီး အဓိကတရားခံဖြစ်တဲ့ အသက် ၄၄ နှစ်အရွယ် ဝါရာဆပ်ဆိုသူကို ဖမ်းဆီးရမိခဲ့တယ်လို့ ဘန်ကောက်မြို့၊ စုံစမ်းစစ်ဆေးရေးရဲတပ်ဖွဲ့ ၈ က ဇွန်လ ၁၂ ရက်၊ ဒီနေ့ထုတ်ပြန်ပါတယ်။
အဲဒီမူးယစ်ဆေးဝါးဖြန့်ဖြူးနေတဲ့ ဂိုဏ်းကြီးတခုကိုရဲတပ်ဖွဲ့ကစစ်ဆေးရာမှာ ကားနောက်ဖုံးထဲမှာ ဆိတ်ဆိတ်ဝှက်ထားတဲ့ အိုက်စ် (Ice) ဆေးပြားတွေကို တွေ့ရှိခဲ့သလို သူတို့ငှားရမ်းထားတဲ့အိမ်ထဲမှာလည်း ထပ်မံစစ်ဆေးခဲ့တယ်လို့ဆိုပါတယ်။
အဲဒီအိမ်ထဲမှာ အိုက်စ်တွေကို သံပိုက်လုံးပေါင်း ၇၃၁ လုံးထဲမှာ ထည့်သွင်းသိမ်းဆည်းထားတာကို တွေ့ရှိခဲ့ရပြီး စုစုပေါင်း အိုက်စ်အလေးချိန် ၇၃.၄ ကီလိုဂရမ်အထိ ဖမ်းဆီးရမိခဲ့တာလို့ဆိုပါတယ်။
အဲဒီမူးယစ်ဆေးဝါးတွေအပြင် တရားမဝင်သေနတ်တလက်၊ ခဲယမ်းတွေနဲ့ ငွေသား ၁ သိန်းဘတ်တို့ကိုလည်း ရဲတပ်ဖွဲ့က သက်သေအထောက်အထားအဖြစ် သိမ်းဆည်းနိုင်ခဲ့တယ်လို့ဆိုပါတယ်။
အဲဒီဖမ်းဆီးရမိသူကို မူးယစ်ဆေးဝါးရောင်းဝယ်ဖောက်ကားမှုနဲ့ တရားမဝင်လက်နက်ကိုင်ဆောင်မှုတွေအတွက် ဥပဒေနဲ့အညီ အရေးယူဖို့ လုပ်ဆောင်နေပြီး ကျန်ရှိနေတဲ့ဂိုဏ်းဝင်တွေကိုလည်း ဆက်လက်ဖမ်းဆီးသွားဖို့ စီစဉ်နေတယ်လို့ဆိုပါတယ်။
