Border News Agency
အီရန်၊ ဧပြီ ၂၂။
အီရန်ဘက်က အဆိုပြုချက်တခု တင်ပြလာပြီး ဆွေးနွေးမှုတွေပြီးဆုံးသွားတဲ့အထိ အပစ်အခတ်ရပ်စဲရေးကို ဆက်ပြီး သက်တမ်းတိုးပေးထားမယ်လို့ အမေရိကန်သမ္မတ ဒေါ်နယ်ထရန့်က ဧပြီလ၂၁ ရက်နေ့မှာ ပြောကြားလိုက်ပါတယ်။
ဒါဟာ အီရန်ဘက်က ခေါင်းဆောင်တွေ တညီတညွတ်တည်းဖြစ်မယ့် အဆိုပြုချက်တခု ထွက်ပေါ်လာဖို့အတွက် အချိန်ပေးပါဦးဆိုတဲ့ ပါကစ္စတန်ရဲ့ တောင်းဆိုချက်ကြောင့် အခုလို တိုက်ခိုက်မှုတွေကို ခေတ္တဆိုင်းငံ့ပေးလိုက်တာလို့ ထရန့်က ဆိုပါတယ်။
ပါကစ္စတန် စစ်သေနာပတိချုပ်နဲ့ ဝန်ကြီးချုပ်တို့က အီရန်ဘက်က ခေါင်းဆောင်တွေကြား ညှိနှိုင်းဖို့ အချိန်တောင်းလာတာဖြစ်ပြီး လက်ရှိမှာတော့ အီရန်အစိုးရအတွင်းမှာ အကွဲအပြဲတွေ ဖြစ်နေတာဟာ မျှော်လင့်ထားတဲ့အတိုင်းပဲလို့လည်း ထရန့်က ပြောပါတယ်။
အပစ်ရပ်ထားပေမယ့် အမေရိကန်စစ်တပ်ကိုတော့ ပင်လယ်ရေကြောင်း ပိတ်ဆို့မှုတွေ ဆက်လုပ်ထားဖို့နဲ့ တခြားကဏ္ဍပေါင်းစုံမှာလည်း အသင့်အနေအထားအတိုင်း ဆက်ရှိနေဖို့ အမိန့်ပေးထားတယ်လို့ သိရပါတယ်။
အီရန်ဘက်က အဆိုပြုချက် တင်သွင်းလာပြီး ဒီဆွေးနွေးမှုတွေကနေ တနည်းမဟုတ်တနည်းနဲ့ အဖြေတခု ထွက်လာတဲ့အထိ အပစ်အခတ်ရပ်စဲရေးကို ဆက်ပြီး သက်တမ်းတိုးပေးထားမှာဖြစ်တယ်လို့ ထရန့်က အတည်ပြုပြောကြားခဲ့ပါတယ်။
