Border News Agency
မီဇိုရမ်၊ မတ် ၉။
မီဇိုရမ်ပြည်နယ်၊ ဆိုင်းဟားခရိုင်မှာ ချင်းအမျိုးသားတဦးဆီက လေသေနတ် ၁၉ လက်နဲ့ကျည်ဆန်အမြောက်အမြားကို အာသံရိုင်ဖယ်တပ်နဲ့ မီဇိုရမ်ရဲတပ်ဖွဲ့တို့ ပူးပေါင်းပြီးဖမ်းဆီးခဲ့တယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီဆိုင်းဟားခရိုင်၊ နီးယော့တလန်ကျေးရွာအနီးမှာ မတ်လ ၅ ရက်နေ့ကမသင်္ကာဖွယ် ကားတစီးကို ရပ်တန့်စစ်ဆေးရာကနေ အခုလို ဖမ်းမိခဲ့တာပါ။
အဲဒီ ဖမ်းဆီးရမိသူဟာ ချင်းပြည်၊ မတူပီမြို့နယ်ကအသက် ၃၆ နှစ်အရွယ် ခါလျန် (Khar Lian)ဖြစ်ပါတယ်။
သယသယ်ဆောင်လာတဲ့ ကားပေါ်ကနေ NX200 အမျိုးအစား လေသေနတ် ၁၈ လက်၊ PX100 အမျိုးအစား လေသေနတ် ၁ လက်၊လေသေနတ်ကျည် ၇၅,၀၀၀ ကျော်နဲ့အတူ မှန်ပြောင်းအပါအဝင် ဆက်စပ်ပစ္စည်းတွေကို သိမ်းဆည်းရမိခဲ့တာပါ။
အဲဒီ ဖမ်းဆီးရမိတဲ့ လက်နက်ခဲယမ်းတွေနဲ့အတူ ခါလျန်ကို ဆိုင်းဟားမြို့မရဲစခန်းမှာ အမှုဖွင့်ပြီး စစ်ဆေးမေးမြန်းမှုတွေ ဆက်လက်လုပ်ဆောင်နေတယ်လို့ သိရပါတယ်။
