Border News Agency
နေပြည်တော်၊ ဧပြီ ၁၁ ။
နိုင်ငံတော်သမ္မတအဖြစ် ကတိသစ္စာပြုပြီးနောက်မှာ ဦးမင်းအောင်လှိုင်က သူ့ရဲ့အစိုးရသစ်လက်ထက်ရက်ပေါင်း ၁၀၀ အတွင်းမှာ တိုင်းပြည်တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေးကို အဓိကဦးစားပေးလုပ်ဆောင်သွားမယ်လို့ ပြောကြားလိုက်ပါတယ်။
ဒါ့အပြင် တိုင်းပြည်ပြန်လည်သင့်မြတ်ရေးအတွက်ဆိုပြီး ထိုက်သင့်တဲ့ပြစ်ဒဏ်လွတ်ငြိမ်းချမ်းသာခွင့်တွေကိုလည်း ပေးဖို့စဉ်းစားမယ်လို့ ဆိုပါတယ်။
ဒါပေမယ့် ဒါဟာဘယ်လိုလူမျိုးတွေကို လွှတ်ပေးမှာလဲဆိုတာကိုတော့ တိတိကျကျထည့်သွင်းပြောဆိုသွားတာမျိုး မရှိပါဘူး။
နိုင်ငံတကာဆက်ဆံရေးပိုင်းမှာတော့ မြန်မာနိုင်ငံဟာ အာဆီယံအဖွဲ့ဝင်ဖြစ်တာကြောင့် အာဆီယံနဲ့ပုံမှန်ဆက်ဆံရေးပြန်ရအောင် ကြိုးစားမယ်လို့ ဆိုပါတယ်။
ဒါပေမယ့် လက်ရှိမြေပြင်ပဋိပက္ခတွေကြောင့် အာဆီယံနဲ့ဆက်ဆံရေးဟာ စိန်ခေါ်မှုတွေရှိနေဆဲပဲဖြစ်ပါတယ်။
အဲဒီအပြင်တရားစီရင်ရေးနဲ့ ပတ်သက်လို့လည်း နိုင်ငံသားတိုင်းဥပဒေအကာအကွယ်ရဖို့နဲ့ တရားရုံးတွေဖြောင့်မတ်ဖို့ လုပ်မယ်လို့ဆိုပါတယ်။
ဒါပေမယ့် လက်တွေ့မှာတော့ တရားဥပဒေစိုးမိုးရေးထက် စစ်ရေးတင်းမာမှုတွေက ပိုပြီးကြီးစိုးနေတာကိုတွေ့ရပါတယ်။
ငြိမ်းချမ်းရေးအတွက် NCA လမ်းကြောင်းအတိုင်းသွားမယ်လို့ပြောပေမယ့် တိုက်ပွဲတွေပြင်းပြင်းထန်ထန်ဖြစ်နေတဲ့ တိုင်းရင်းသားအဖွဲ့တွေနဲ့ ဘယ်လိုညှိနှိုင်းမလဲဆိုတဲ့ အချက်ကတော့ အခုထိရှင်းရှင်းလင်းလင်းမရှိသေးဘူးလို့ နိုင်ငံရေးလေ့လာသူတွေက သုံးသပ်နေကြပါတယ်။
