Border News Agency
နေပြည်တော်၊ မေ ၁၂။
အာဆီယံနဲ့ရွေးကောက်ပွဲကိစ္စတွေအပေါ် အာဏာသိမ်းစစ်တပ်က မကြာသေးခင်က ထုတ်ပြန်ခဲ့တဲ့ ပြောဆိုချက်တွေဟာ ရှေ့နောက်မညီဘဲ နိုင်ငံရေးအရ ရိုးသားမှုမရှိတာကြောင့် ကန့်ကွက်ရှုတ်ချတယ်လို့ အမျိုးသားညီညွတ်ရေးအစိုးရ (NUG) က မေလ ၁၁ ရက်၊မနေ့ကထုတ်ပြန်လိုက်ပါတယ်။
ပြီးခဲ့တဲ့ ၂၀၂၀ ရွေးကောက်ပွဲရလဒ်ကို တရားမဝင် ဖျက်သိမ်းခဲ့တဲ့ အာဏာသိမ်းစစ်တပ် ခေါင်းဆောင်တွေက အခုအချိန်မှာ ရွေးကောက်ပွဲရလဒ်တွေကို လေးစားဖို့ ပြောနေတာဟာ ယုံကြည်စရာမရှိဘူးလို့ NUG က ဆိုပါတယ်။
ဒါ့အပြင် အာဏာသိမ်းစစ်တပ်ဟာ အာဆီယံရဲ့ ဘုံသဘောတူညီချက် ၅ ရပ်ကို အကောင်အထည်ဖော်ဖို့ ပျက်ကွက်နေသလို ပြည်သူတွေအပေါ် အကြမ်းဖက် တိုက်ခိုက်မှုတွေကိုလည်း ဆက်လုပ်နေတယ်လို့ ထောက်ပြထားပါတယ်။
အာဏာသိမ်းစစ်တပ်ရဲ့ လက်အောက်မှာ လုပ်မယ့် ဘယ်လိုရွေးကောက်ပွဲမျိုးမဆို လွတ်လပ်ပြီး တရားမျှတမှု ရှိမှာမဟုတ်သလို ဒါဟာ နိုင်ငံရေးအရ တရားဝင်မှုရဖို့ ကြိုးစားတဲ့ အတုအယောင် လုပ်ရပ်သာဖြစ်တယ်လို့ဆျုပါတယ်။
အဲဒီအပြင်ပြည်သူတွေ လိုလားတဲ့ ဒီမိုကရေစီဆန္ဒကို စစ်အာဏာရှင်စနစ်အောက်မှာ ဘယ်တော့မှ ရနိုင်မှာမဟုတ်ဘူးလို့လည်း ဆိုပါတယ်။
ဒါကြောင့် အာဆီယံ၊ကုလသမဂ္ဂနဲ့ နိုင်ငံတကာ အသိုင်းအဝိုင်းအနေနဲ့ အနာဂတ် ဖက်ဒရယ်ဒီမိုကရေစီ အပြောင်းအလဲအတွက် မြန်မာပြည်သူတွေရဲ့ မျှော်လင့်ချက်ကို ဆက်ပြီး ထောက်ခံပေးကြဖို့ NUG က တိုက်တွန်းထားပါတယ်။
တာဝန်ခံမှုမရှိဘဲ တရားဝင်မှုရဖို့ ကြိုးပမ်းနေတဲ့ အာဏာသိမ်းစစ်တပ်ရဲ့ လုပ်ရပ်တွေကို အသိအမှတ်မပြုကြဖို့လည်း တောင်းဆိုထားပါတယ်။
မြန်မာ့နိုင်ငံရေး ပြဿနာကို အတင်းအကျပ် ကျင်းပမယ့် အတုအယောင် ရွေးကောက်ပွဲတွေနဲ့ ဖြေရှင်းလို့ရမှာမဟုတ်ဘဲ၊ အားလုံးပါဝင်နိုင်တဲ့ နိုင်ငံရေး အကူးအပြောင်းကနေတဆင့် အခြေခံကျကျ ဖြေရှင်းတာကသာ တခုတည်းသော နည်းလမ်းဖြစ်တယ်လို့ဆိုပါတယ်။
