Border News Agency
မီဇိုရမ်၊ မေ ၂၁။
မြန်မာ-မီဇိုရမ်နယ်စပ် စီကူးလ်မြစ်လမ်းကြောင်းကနေ စက်လှေနဲ့တရားမဝင်သယ်ဆောင်လာတဲ့ တန်ဖိုးကြီးရှားပါးဆေးဖက်ဝင်အပင်ဖြစ်တဲ့ အန်ချီရီအိတ်အများအပြားကို အာသံရိုင်ဖယ်ရဲတပ်ဖွဲ့က ဖမ်းဆီးရမိခဲ့တယ်လို့ သိရပါတယ်။
နယ်စပ်တလျှောက် ပုံမှန်ကင်းလှည့်စစ်ဆေးမှုတွေလုပ်ဆောင်နေတဲ့ အာသံရိုင်ဖယ်တပ်ဖွဲ့ဝင်တွေဟာ နယ်စပ်အနီးမှာသံသယဖြစ်ဖွယ် လှုပ်ရှားမှုတွေကို တွေ့ရှိခဲ့တာကြောင့် ချက်ချင်းဝင်ရောက်စီးနင်းခဲ့တာလို့ဆိုပါတယ်။
အဲဒီမှောင်ခိုသမားတွေဟာ ဆေးဖက်ဝင်အပင်တွေကို စက်လှေနဲ့သယ်ဆောင်လာပြီး မြစ်ကြောင်းနဲ့ မော်တော်ကားလမ်းဆုံတဲ့နေရာမှာ အသင့်စောင့်နေတဲ့ကုန်တင်ကားပေါ်ကို ရွှေ့ပြောင်းတင်ဆောင်နေတုန်း ဖမ်းဆီးခံရတာဖြစ်ပါတယ်။
အဲဒီစီးနင်းမှုအတွင်း စုစုပေါင်းဆေးဖက်ဝင်အပင်အိတ် ၁၀၂ အိတ်၊ ခန့်မှန်းတန်ဖိုး အိန္ဒိယရူပီး ၃၆ သိန်းခန့်ကို သိမ်းဆည်းရမိခဲ့ပြီး၊ မှောင်ခိုကူးမှုနဲ့ဆက်စပ်နေတဲ့ အိန္ဒိယနိုင်ငံသား ၃ ဦးကိုလည်း အခင်းဖြစ်ပွားရာနေရာမှာတင် ဖမ်းဆီးထိန်းသိမ်းနိုင်ခဲ့ပါတယ်။
အဲဒီဖမ်းဆီးရမိတဲ့ ဆေးဖက်ဝင်အပင်တွေ၊ သယ်ဆောင်တဲ့မော်တော်ယာဉ်နဲ့ ပြစ်မှုကျူးလွန်သူတွေကို ဆက်လက်အရေးယူနိုင်ဖို့အတွက် သက်ဆိုင်ရာ လောင်တလိုင်ခရိုင်တွင်းရှိ ဘုန်တလန်ရဲစခန်းနဲ့ ဆီဟာသစ်တောဌာနတို့ဆီ လွှဲပြောင်းပေးအပ်ထားတယ်လို့ သိရပါတယ်။
အဲဒီအန်ချီရီဆေးဖက်ဝင်အပင်ဟာ ရောင်ရမ်းတာ၊ ကူးစက်ရောဂါနဲ့ဒဏ်ရာတွေကို ကုသတဲ့နေရာမှာအလွန်ထိရောက်တာကြောင့် တိုင်းရင်းဆေးဖက်ဝင်အဖြစ်သာမက ဆေးဝါးဗေဒသုတေသနလုပ်ငန်းတွေမှာပါ ဈေးကွက်ဝယ်လိုအားအလွန်မြင့်မားပြီး အခုလိုမြန်မာနိုင်ငံဘက်ကနေ နယ်စပ်ဖြတ်ကျော် မှောင်ခိုကူးခံရလေ့ရှိတဲ့ ရှားပါးသယံဇာတတမျိုးဖြစ်ပါတယ်။
