Border News Agency
နေပြည်တော်၊ မေ ၂၃။
အွန်လိုင်းကတဆင့် ကျင်းပခဲ့တဲ့ ၂၃ ကြိမ်မြောက် အာဆီယံတပ်မတော်ကာကွယ်ရေးဦးစီးချုပ်များ အစည်းအဝေးမှာ အာဏာသိမ်းစစ်တပ်ရဲ့ကာကွယ်ရေးဦးစီးချုပ်သစ်ရဲဝင်းဦးက မြန်မာနိုင်ငံမှာ ဒီမိုကရေစီနည်းလမ်းတကျ ရွေးကောက်တင်မြှောက်ထားတဲ့ အစိုးရရှိနေပြီလို့ ပြောပါတယ်။
အဲဒီအစည်းအဝေးကိုမေလ ၂၁ ရက်နေ့မှာ ဗီဒီယိုကွန်ဖရင့်စနစ်နဲ့ပြုလုပ်ခဲ့တာဖြစ်ပြီး ဖိလစ်ပိုင်တပ်မတော်စစ်ဦးစီးချုပ်က ဥက္ကဋ္ဌအဖြစ် ဆောင်ရွက်ကာ မိမိတို့ အနာဂတ်လုံခြုံစိတ်ချရစေဖို့ အတူလက်တွဲဆောင်ရွက်ကြစို့ဆိုတဲ့ ခေါင်းစဉ်နဲ့ ကျင်းပခဲ့တာပါ။
အစည်းအဝေးအတွင်းကာချုပ်အသစ်ရဲဝင်းဦးက မြန်မာနိုင်ငံမှာပြည်သူ့ဆန္ဒအတိုင်း ရွေးကောက်တင်မြှောက်ထားတဲ့ လွှတ်တော်တွေနဲ့ အစိုးရသစ် ပေါ်ထွက်လာပြီဖြစ်ကြောင်း၊ ရှေ့ဆက်ပြီးလည်း ဖက်ဒရယ်စနစ်နဲ့ တရားဥပဒေစိုးမိုးရေးတို့ကို ဆောင်ရွက်သွားမှာဖြစ်ကြောင်း ပြောဆိုခဲ့ပါတယ်။
ဒါ့အပြင် အင်အားကြီးနိုင်ငံတွေက ဒေသတွင်းနိုင်ငံငယ်တွေကို နည်းလမ်းမျိုးစုံနဲ့ လွှမ်းမိုးဖို့ ကြိုးပမ်းနေတယ်လို့လည်း ထည့်သွင်းပြောခဲ့ပါတယ်။
အာဏာသိမ်းစစ်တပ်ကက ရွေးကောက်ပွဲအောင်မြင်ကြောင်း ပြောဆိုနေပေမယ့် လက်တွေ့မှာတော့ သူတို့ပြုလုပ်ခဲ့တဲ့ ရွေးကောက်ပွဲအပေါ် ပြည်တွင်းပြည်ပ ပြည်သူတွေ ထောက်ခံမှုမရှိတဲ့အပြင် နိုင်ငံတကာကလည်း အသိအမှတ်မပြုထားပါဘူး။
အာဆီယံအနေနဲ့ စစ်ခေါင်းဆောင်ဟောင်း မင်းအောင်လှိုင်ကို ထိပ်သီးအစည်းအဝေးတွေ တက်ရောက်ခွင့် ပိတ်ပင်ထားခဲ့ပေမယ့် ကာချုပ်အသစ် ရဲဝင်းဦးကိုတော့ အခုအစည်းအဝေးမှာ အွန်လိုင်းကတဆင့် တက်ရောက်ခွင့်ပြုခဲ့တာ ဖြစ်ပါတယ်။
အဲဒီအစည်းအဝေးကို ဘရူနိုင်း၊ ကမ္ဘောဒီးယား၊ အင်ဒိုနီးရှား၊ မလေးရှား၊ ထိုင်း၊ ဗီယက်နမ် အပါအဝင် အာဆီယံနိုင်ငံစုံက တပ်မတော်ကာကွယ်ရေးဦးစီးချုပ်တွေ တက်ရောက်ခဲ့ကြပါတယ်။
