Border News Agency
ထိုင်း၊ မေ ၂၂။
ထိုင်းနိုင်ငံအရှေ့ပိုင်း၊ ရယွန်ခရိုင်က အနှိပ်ခန်းအမည်ခံဖွင့်ထားတဲ့ ပြည့်တန်ဆာလုပ်ငန်းတခုကို ရဲတပ်ဖွဲ့က အသွင်ယူဝင်ရောက်ဖမ်းဆီးခဲ့တာကြောင့် မြန်မာနိုင်ငံသား ၄ ဦးအပါအဝင် နိုင်ငံခြားသား ၈ ဦး ဖမ်းဆီးခံလိုက်ရပါတယ်။
ရယွန်ခရိုင်၊ ပလွတ်ဒဲန်းဒေသမှာရှိတဲ့ ကူကျူလင်ကျန်းမာရေးအနှိပ်ခန်းမှာ လိင်ပိုင်းဆိုင်ရာ ဝန်ဆောင်မှုပေးနေတယ်ဆိုတဲ့သတင်းအရ မေလ ၂၁ ရက်နေ့က ရဲတပ်ဖွဲ့ဝင်တဦးက ဖောက်သည်အဖြစ် အသွင်ယူပြီး ငွေပေးချေကာ ဝင်ရောက်ဖမ်းဆီးခဲ့တာ ဖြစ်ပါတယ်။
အဲဒီအနှိပ်ခန်းထဲမှာ လိင်ဝန်ဆောင်မှုပေးတဲ့ အခန်း ၁၀ ခန်းနဲ့ အတူကွန်ဒုံး၊ ချောဆီ စတဲ့ သက်သေခံပစ္စည်းတွေကိုသိမ်းဆည်းရမိခဲ့သလို ဆိုင်မန်နေဂျာနဲ့ အလုပ်သမားနိုင်ငံခြားသား ၈ ဦးကိုလည်း ဖမ်းဆီးခဲ့ပါတယ်။
အဲဒီဖမ်းဆီးခံရသူတွေထဲမှာ မြန်မာ ၄ ဦး၊ တရုတ် ၂ ဦးနဲ့ ဗီယက်နမ် ၂ ဦး ပါဝင်တာပါ။
ဆိုင်မန်နေဂျာကို တရားမဝင် ပြည့်တန်ဆာလုပ်ငန်းစီစဉ်မှု၊ နိုင်ငံခြားသား တရားမဝင်အလုပ်ခန့်ထားမှုတွေနဲ့ အရေးယူထားပြီး၊ မြန်မာအပါအဝင် အလုပ်သမားတွေကိုတော့ အလုပ်လုပ်ခွင့်လက်မှတ် (Work Permit) မရှိဘဲ အလုပ်လုပ်ကိုင်မှု၊ ပြည့်တန်ဆာလုပ်ငန်းမှာ ပါဝင်ပတ်သက်မှုတွေနဲ့ အမှုဖွင့်ထားပါတယ်။
