Border New Agency
ဂျာမနီ၊ ဇွန် ၃။
မြန်မာနိုင်ငံအတွက် လူသားချင်းစာနာထောက်ထားမှုဆိုင်ရာ ရန်ပုံငွေ (Myanmar Humanitarian Fund)သို့ ခု ၂၀၂၆ ခုနှစ်အတွင်း ဂျာမနီနိုင်ငံက အမေရိကန်ဒေါ်လာ ၁၀ သန်းအထိ ထည့်ဝင်ပံ့ပိုးပေးထားတယ်လို့ မြန်မာနိုင်ငံဆိုင်ရာဂျာမနီသံရုံးက အသိပေးထားပါတယ်။
ပြီးခဲ့တဲ့မေလအတွင်းကလည်း ဂျာမန်နိုင်ငံခြားရေးဝန်ကြီးဌာနရဲ့ လူသားချင်းစာနာထောက်ထားမှုဆိုင်ရာညွှန်ကြားရေးမှူး ဒေါက်တာအီနာ ဟွိုက်စ်ဂန် (Dr. Ina Heusgen) ဟာ မြန်မာနိုင်ငံကိုလာရောက်ပြီး ဒေသခံပြည်သူတွေရဲ့အရေးပေါ်လိုအပ်ချက်တွေကို ကွင်းဆင်းကြည့်ရှုခဲ့တယ်လို့ သံရုံးကဆိုပါတယ်။
ဂျာမနီနိုင်ငံအနေနဲ့ ကုလသမဂ္ဂနဲ့ လူသားချင်းစာနာမှုဆိုင်ရာ အဖွဲ့အစည်းတွေကတဆင့် စစ်ဘေးရှောင်ဒုက္ခသည်စခန်းတွေနဲ့ ဘုန်းတော်ကြီးကျောင်းတွေမှာ ခိုလှုံနေရတဲ့ ပြည်သူတွေရဲ့လူနေမှုဘဝမြှင့်တင်ရေးအတွက် အာရက္ခဒေသအပါအဝင် နိုင်ငံတဝှမ်းလုံးကို ဖြန့်ကြက်ပံ့ပိုးပေးနေတာလို့ဆိုပါတယ်။
အဲဒီအပြင်မြေပြင်အခြေအနေတွေကြားထဲကနေ အသက်အန္တရာယ်စွန့်ပြီးကူညီပေးနေကြတဲ့ လူသားချင်းစာနာထောက်ထားမှုဆိုင်ရာ လုပ်သားအားလုံးကိုလည်း အထူးလေးစားကျေးဇူးတင်တယ်လို့ ဆိုပါတယ်။
ဒါပေမယ့် မြေပြင်မှာ အာဏာသိမ်းစစ်တပ်ရဲ့ လေကြောင်းရန်၊ လက်နက်ကြီးပစ်ခတ်မှုတွေနဲ့ စစ်ကြောင်းထိုးမှုတွေကြောင့် ပြည်သူတွေဟာ နေ့စဉ်နဲ့အမျှ အသက်ဘေးလွတ်ရာကို ထွက်ပြေးတိမ်းရှောင်နေကြရဆဲ ဖြစ်ပါတယ်။
အဲဒီလိုအကူအညီတွေ ပံ့ပိုးပေးနေတယ်လို့ သံရုံးကဆိုပေမယ့် အာဏာသိမ်းစစ်တပ်ရဲ့ စစ်ရေးအရပိတ်ဆို့မှုတွေ၊ လမ်းပန်းဆက်သွယ်ရေး ခက်ခဲမှုတွေကြောင့် နိုင်ငံတကာအကူအညီတွေဟာ မြေပြင်မှာ တကယ်တမ်းဒုက္ခရောက်နေတဲ့ ပြည်သူတွေရဲ့လက်ထဲကို ရောက်မလာဘူးလို့ ပြည်သူတွေကဆိုကြပါတယ်။
