Border News Agency
ထိုင်း၊ဇွန် ၂၀။
ထိုင်းနိုင်ငံရဲ့အီလက်ထရွန်နစ်အလုပ်လုပ်ကိုင်ခွင့်လက်မှတ်စနစ်(e-WorkPermit )ကြန့်ကြာမှုတွေကြောင့် ရွှေ့ပြောင်းလုပ်သားတွေဆီကနေ ပွဲစားတွေက ကျူးကတ် (Queue) ဖိုး ဘတ် ၂,၀၀၀ အထိ ခေါင်းပုံဖြတ်တောင်းခံနေတဲ့ ပြဿနာကို ဖြေရှင်းသွားမယ်လို့ ထိုင်းအလုပ်သမားဝန်ကြီး မစ္စတာ ဂျူလာဖန်က ပြောကြားလိုက်ပါတယ်။
အဲဒီပြဿနာကို ဖြေရှင်းဖို့အတွက် လာမယ့်လထဲမှာ သတ်မှတ်ချက်ပြည့်စုံတဲ့ အစားထိုးထောက်ခံစာထုတ်ပေးပြီးတန်းစီရတဲ့ပြဿနာနဲ့ ပွဲစားခေါင်းပုံဖြတ်မှုကို လျှော့ချသွားမှာလို့ အလုပ်သမားအရေးဆောင်ရွက်သူတွေနဲ့တွေ့ဆုံစဉ် ဝန်ကြီးက ဆိုပါတယ်။
အဲဒီအပြင် စနစ်အခက်အခဲကြောင့် သတ်မှတ်ရက်အတွင်း မှတ်ပုံတင်ဖို့ လွတ်သွားခဲ့ကြတဲ့ ရွှေ့ပြောင်းလုပ်သားတွေအတွက်လည်း မှတ်ပုံတင်ခွင့်အသစ် ပြန်လည်ဖွင့်လှစ်ပေးဖို့ အလုပ်သမားဝန်ကြီးဌာနက စီစဉ်နေပါတယ်။
နောက်ပြီးထိုင်းနိုင်ငံမှာ ၄ နှစ်သက်တမ်းပြည့်သွားတဲ့ မြန်မာအလုပ်သမား ၄ သိန်းမှ ၅ သိန်းခန့်ဟာ မိခင်နိုင်ငံရဲ့ မတည်ငြိမ်တဲ့ အခြေအနေတွေကြောင့် နေရပ်မပြန်လိုကြဘူးလို့ အလုပ်သမားအဖွဲ့အစည်းတွေက ထောက်ပြထားပါတယ်။
အဲဒီ မြန်မာလုပ်သားတွေအနေနဲ့ MOU သက်တမ်းတိုးဖို့ မိခင်နိုင်ငံသို့ ပြန်စရာမလိုဘဲ ထိုင်းနိုင်ငံအတွင်းမှာတင် ဆက်လက်လုပ်ကိုင်ခွင့် လျှောက်ထားနိုင်မယ့် One Stop Service စင်တာတွေ ဖွင့်လှစ်ပေးဖို့ မူဝါဒကော်မတီမှာ ဆက်လက်ဆွေးနွေးသွားမယ်လို့ သိရပါတယ်။
