Border News Agency
အာသံ၊ဇွန် ၂၅။
အိန္ဒိယနိုင်ငံ၊အာသံပြည်နယ်၊ မာသီယာထိန်းသိမ်းရေးစခန်းမှာ ဖမ်းဆီးခံထားရတဲ့ မြန်မာအမျိုးသမီး ၁၀ ဦးအပေါ် လိင်ပိုင်းဆိုင်ရာ မလျော်ကန်တဲ့ ပြုမူဆက်ဆံမှုတွေနဲ့ လူ့အခွင့်အရေး ချိုးဖောက်မှုတွေ ဖြစ်ပွားနေတာနဲ့ ပတ်သက်ပြီး စိုးရိမ်ပူပန်တယ်လို့ India For Myanmar အဖွဲ့က ဇွန်လ ၂၄ ရက်နေ့မှာ ထုတ်ပြန်လိုက်ပါတယ်။
အဲဒီ စခန်းမှာ မြန်မာနိုင်ငံသား ၃၂ ဦး ဖမ်းဆီးခံထားရပြီး အဲဒီအထဲမှာ အမျိုးသမီး ၁၀ ဦး ပါဝင်နေတာပါ။
ဖမ်းဆီးခံရသူတွေရဲ့ ပြောပြချက်အရ ဇွန်လ ၂၂ ရက်၊မနက် ၅ နာရီခန့်မှာ စခန်းလက်ထောက်တာဝန်ခံ Mr. Shantanu Deep ရဲ့ ညွှန်ကြားချက်နဲ့ Assam Rifles တပ်ဖွဲ့ဝင်တွေက မြန်မာအမျိုးသမီးတွေကို ရှာဖွေစစ်ဆေးမှုတွေ လုပ်ခဲ့ကြတယ်လို့ဆိုပါတယ်။
အဲဒီလို စစ်ဆေးရာမှာ အမျိုးသမီးလုံခြုံရေးဝန်ထမ်းတွေ မပါဝင်ဘဲ အမျိုးသားတပ်ဖွဲ့ဝင်တွေကသာ စစ်ဆေးခဲ့တာဖြစ်ပြီး စခန်းထဲက အကျဉ်းသား ၈၀ ခန့်ရှိတဲ့အနက် မြန်မာအ
မျိုးသမီး ၁၀ ဦးကိုပဲ သီးသန့်ရွေးချယ်ကာ တကိုယ်လုံး ရှာဖွေစစ်ဆေးခဲ့တာလို့ဆိုပါတယ်။
အဲဒီ စစ်ဆေးမှုအတွင်း အမျိုးသားတွေက မသင့်လျော်တဲ့ ကိုယ်ခန္ဓာအစိတ်အပိုင်းတွေကို ထိတွေ့ကိုင်တွယ်တာတွေ ရှိခဲ့သလို ဒီလိုစစ်ဆေးမှုမျိုးကို နေ့စဉ် ဒါမှမဟုတ် အပတ်စဉ် ဆက်လုပ်သွားမယ်ဆိုပြီး ခြိမ်းခြောက်ပြောဆိုတာတွေလည်း ရှိခဲ့တယ်လို့ ဆိုပါတယ်။
ဒီလိုလုပ်ရပ်ဟာ အိန္ဒိယနိုင်ငံရဲ့ တည်ဆဲဥပဒေတွေဖြစ်တဲ့ BNSS ပုဒ်မ ၄၉(၂) နဲ့ BNS ပုဒ်မ ၇၄ တို့ကို တိုက်ရိုက်ချိုးဖောက်နေတဲ့အပြင် အိန္ဒိယနိုင်ငံကိုယ်တိုင် ပါဝင်လက်မှတ်ရေးထိုးထားတဲ့ နိုင်ငံတကာ အရပ်ဘက်နဲ့ နိုင်ငံရေးအခွင့်အရေးများဆိုင်ရာ ပဋိညာဉ်စာချုပ် (ICCPR) အပိုဒ် ၁၀ ကိုလည်း ချိုးဖောက်နေတာလို့ဆိုပါတယ့။
အဲဒါကြောင့် India For Myanmar အဖွဲ့အနေနဲ့ ဒီစွပ်စွဲချက်တွေအပေါ် လွတ်လပ်ပြီး ပွင့်လင်းမြင်သာတဲ့ စုံစမ်းစစ်ဆေးမှုတွေ ချက်ချင်းလုပ်ပေးဖို့၊ ထိန်းသိမ်းခံမြန်မာနိုင်ငံသားတွေရဲ့ အခြေခံလူ့အခွင့်အရေးကို ကာကွယ်ပေးဖို့နဲ့ UNHCR အပါအဝင် နိုင်ငံတကာအဖွဲ့အစည်းတွေအနေနဲ့ ဒီကိစ္စကို အလေးအနက်ထား အမြန်ဆုံးကူညီဆောင်ရွက်ပေးဖို့ တောင်းဆိုထားပါတယ်။
