Border News Agency
မောင်တော၊ဇူလိုင် ၃။
အာရက္ခတပ်တော်(AA)ထိန်းချုပ်ထားတဲ့ မောင်တောမြို့နယ်၊ကြိမ်ချောင်းရှိ စစ်သုံ့ပန်းတွေထိန်းသိမ်းထားတဲ့အကျဉ်းထောင်ကိုဇူလိုင်လ ၂ ရက်၊ညနေ ၃ နာရီ အချိန်ခန့်က အာဏာသိမ်းစစ်တပ်လေကြောင်းတိုက်ခိုက်ခဲ့ပါတယ်။
အဲဒီလို တိုက်ခိုက်ခဲ့တာကြောင့် စစ်သုံ့ပန်းအဖြစ် ဖမ်းဆီးထားတဲ့ အရာရှိကြီးတဦးအပါအဝင်လေးဦးသေဆုံးခဲ့တယ်လို့ အကျဉ်းထောင်မှ တာဝန်ရှိသူတဦးက အတည်ပြု ပြောထားပါတယ်။
အဲဒီ ကြိမ်ချောင်းကျေးရွာရှိ စစ်သုံ့ပန်းတွေထားတဲ့နေရာကိုအာဏာသိမ်းစစ်တပ်ဟာတိုက်လေယာဥ်နှစ်စီးနဲ့ ပေါင် ၅၀၀ ဗုံးခြောက်လုံး၊Y-12 လေယာဉ်နဲ့လည်း ဗုံးခုနှစ်လုံးအထိ ရွယ်ရည်ချက်ရှိရှိတိုက်ခိုက်ခဲ့တာလို့ ဒေသခံတွေကဆိုကြပါတယ်။
အဲဒီလိုတိုက်ခိုက်ခဲ့တာကြောင့် အကျဉ်းစခန်းအတွင်းဆေးကုသမှုပေးဖို့ တာဝန်ပေးထားတဲ့ အာဏာသိမ်းစစ်တပ်မှဗိုလ်ကြီးတဦးနဲ့ စစ်သုံ့ပန်းသုံးဦး၊ စုစုပေါင်းလေးဦးနေရာမှာပင် သေဆုံးခဲ့ရပြီး အကျဉ်းစခန်းရှိ အဆောင်အချို့လည်း ပျက်စီးသွားခဲ့ပါတယ်။
အာဏာသိမ်းစစ်တပ်ဟာ အာရက္ခတပ်တော်ထိန်းချုပ်နယ်မြေတွေရှိ အရပ်သားတွေနေထိုင်တဲ့နေရာတွေ၊စစ်သုံ့ပန်းတွေထားတဲ့ နေရာတွေကို ရွယ်ရည်ချက်ရှိရှိလေကြောင်းတိုက်ခိုက်တာတွေပြုလုပ်နေတာကြောင့် နေ့စဥ်နဲ့အမျှ သေဆုံး၊ဒဏ်ရာရနေကြရပါတယ်။
အာဏာသိမ်းစစ်တပ်ဟာ မိမိတို့တပ်ဖွဲ့ဝင်တွေနဲ့ မိသားစုဝင်တွေဖြစ်နေတာတောင် ရက်ရက်စက်စက် လေကြောင်းကနေ ပစ်မှတ်ထား တိုက်ခိုက်ခဲ့တာဟာ စစ်သုံ့ပန်းတွေရဲ့အသက်အန္တရာယ်ကို လျစ်လျူရှုတဲ့ လုပ်ရပ်ဖြစ်တယ်လို့ အာရက္ခတပ်တော်ကဆိုပါတယ်။
