Border News Agency
မင်းပြား၊ ဇူလိုင် ၃။
အာရက္ခတပ်တော်ထိန်းချုပ်ထားတဲ့ မင်းပြားနဲ့ ပေါက်တောမြို့နှစ်မြို့ရဲ့ နာမည်တွေကို မကြာခင်မှာအသစ်ပြန်လည်ပြောင်းလဲသတ်မှတ်တော့မယ်လို့ ရက္ခိုင့်အမျိုးသားအဖွဲ့ချုပ်(ULA) မင်းပြားခရိုင် တာဝန်ရှိသူတွေက ဇူလိုင် ၁ ရက်နေ့မှာ ပြောပါတယ်။
အဲဒီနာမည်သစ်တွေကို ဗဟိုကသဘောတူထားပြီးသားဖြစ်ပေမယ့် ဘယ်နာမည်တွေဖြစ်လာမလဲဆိုတာကိုတော့ အခုထိတရားဝင်ထုတ်ပြန်တာမျိုး မရှိသေးပါဘူး။
ဒီအပြောင်းအလဲကိုကြိုဆိုတဲ့အနေနဲ့ မင်းပြားနဲ့ ပေါက်တောမြို့နှစ်မြို့လုံးမှာ ဇူလိုင် ၁ ရက်နေ့က ဒေသခံပြည်သူတွေ၊ ULA တာဝန်ရှိသူတွေနဲ့ အာရက္ခစစ်သည်တော်တွေပူးပေါင်းပြီး အထိမ်းအမှတ်သစ်ပင်စိုက်ပွဲတွေကို တပြိုင်နက်တည်းလုပ်ဆောင်ခဲ့ကြပါတယ်။
အဓိကလမ်းမတွေရဲ့ ဘေးဝဲယာမှာ စိန်ပန်းပင်နဲ့ မလေးရှားပိတောက်ပင်တွေကို စိုက်ပျိုးခဲ့ကြတာဖြစ်ပြီး မြို့နာမည်ပြောင်းတာဟာ ဒေသတခုရဲ့ သမိုင်းနဲ့ယဉ်ကျေးမှုကို ထင်ဟပ်စေတဲ့ အရေးပါတဲ့လုပ်ဆောင်ချက်တခုဖြစ်တယ်လို့ ဆိုပါတယ်။
