Border News Agency
ကန်ချနပူရီ၊ ဇူလိုင် ၆။
ထိုင်းနိုင်ငံ၊ ကန်ချနဘူရီခရိုင်၊ စံခလဘူရီမြို့နယ်အတွင်းကို တရားမဝင်ဝင်ရောက်လာတဲ့ မြန်မာအလုပ်သမား ၂၆ ဦးကိုထိုင်းအာဏာပိုင်တွေက ဇူလိုင်လ ၄ ရက်၊ ညပိုင်းမှာ ဖမ်းဆီးခဲ့တယ်လို့ သိရပါတယ်။
ရဲတပ်ဖွဲ့နဲ့ နယ်စပ်တပ်ဖွဲ့ဝင်တွေပါဝင်တဲ့ ပူးပေါင်းအဖွဲ့ဟာ စံခလဘူရီမြို့နယ်၊ နောင်လူးကျေးရွာအုပ်စုအတွင်းရှိ နယ်စပ်လမ်းကြောင်းတလျှောက်မှာကင်းလှည့်နေတုန်း ကလေးငယ်တွေအပါအဝင် မြန်မာလုပ်သား ၁၁ ဦးကို ပထမဆုံး စတင်တွေ့ရှိ ဖမ်းဆီးခဲ့တာဖြစ်ပါတယ်။
သူတို့ကို နမ်ကစ်ဂိတ်ဆီ ခေါ်ဆောင်စစ်ဆေးရာမှာ နိုင်ငံကူးလက်မှတ် သို့မဟုတ်ထိုင်းနိုင်ငံအတွင်း နေထိုင်ခွင့်ပြုတဲ့အထောက်အထားစာရွက်စာတမ်းတစုံတရာပြနိုင်တာမရှိတာကြောင့် ခွင့်ပြုချက်မရှိဘဲ ဝင်ရောက်နေထိုင်မှုနဲ့ အရေးယူထားပါတယ်။
အဲဒီနေ့ညမှာပဲ စံခလဘူရီမြို့နယ်၊ ဘန့်ဆမ်လန့် တောစပ်အနီးမှာ တရားမဝင်ဝင်ရောက်ပုန်းအောင်းနေတဲ့ မြန်မာအမျိုးသား ၄ ဦးနဲ့ အမျိုးသမီး ၁၁ ဦး၊ စုစုပေါင်း ၁၅ ဦးကိုလည်း နယ်စပ်တပ်ဖွဲ့က ထပ်မံဖမ်းဆီးရမိခဲ့ပါတယ်။
အဲဒီဖမ်းဆီးခံရတဲ့မြန်မာလုပ်သား ၂၆ ဦးစလုံးကို ဥပဒေအရထိရောက်စွာအရေးယူနိုင်ဖို့အတွက် သက်ဆိုင်ရာရဲစခန်းတွေကို ပို့ဆောင်ထားတယ်လို့ သိရပါတယ်။
