Border News Agency
ပုဏ္ဏားကျွန်း၊ ဇူလိုင် ၂၄။
အာရက္ခတပ်တော်(AA)ထိန်းချုပ်ထားတဲ့ ပုဏ္ဏားကျွန်းမြို့နယ်မှာ အမျိုးသမီးငယ်တဦး လက်ထိပ်ခတ်မဒိန်းကျင့်သ တ်ဖြတ်ခံရတယ်လို့ ပုဏ္ဏားကျွန်းဒေသခံတွေက အတည်ပြုပြောကြပါတယ်။
အဲဒီအသက်နှစ်ဆယ်ကျော်အရွယ် အမျိုးသမီးငယ်ဟာ ပုဏ္ဏားကျွန်းမြို့နယ်၊ အောင်ဆိပ်ကျေးရွာကဖြစ်ပြီး သူမရုပ်အလောင်းကို ပုဏ္ဏားကျွန်းမြို့နယ်၊ တောင်ပေါက်အနီးရှိကျောက်ကွင်းမြောင်နားမှာတွေ့တာပါ။
အဲဒီအမျိုးသမီးကို လက်နောက်ပြန်လက်ထိပ်ခတ်ထားသလို ခြေထောက်ကိုလည်းဆိုင်ကယ်တာယာကြိုးနဲ့ချဥ်ထားပြီး မဒိန်းကျင့်သတ်ဖြတ်ထားတာဖြစ်ပါတယ်။
အဲဒီအပြင် အမျိုးသမီးအင်္ဂါစပ်၊ သားမြတ်အပါအဝင် ကိုယ်ခန္ဓာတခုလုံးကို နေရာမျိုးစုံလှီးဖြတ်ထားပြီး ဆံပင်တွေကိုလည်းကိုက်ဖြတ်ထားသလို ကိုယ်ခန္ဓာအောက်ပိုင်းလည်း ဝတ်လစ်စလစ်ဖြစ်ကာ ရုပ်ပျက်ဆင်းပျက်သတ်ဖြတ်အလောင်းဖျောက်ခံထားရတာလို့ ပုဏ္ဏားကျွန်းဒေသခံတွေက ဆိုကြတယ်။
“မိန်းကလေးကို နို့အုံတွေကိုလှီး၊ ခေါင်းတွေကိုလှီးပြီး မအင်္ဂါစတွေကိုထိုးထားတာပါ။ အပိုင်းပိုင်းလုပ်ထားပါတယ်။ခန္ဓာအင်္ဂါတွေမစုံတော့ပါဘူး။ ကတုံးတွေတုံးပြီး ခြေထောက်တွေမှာ ကြိုးတွေတုတ်ပါတယ်။ ပုံစံအမျိုးမျိုး သတ်ဖြတ်ထားတာပါ။” လို့ ကိုယ်တိုင်သွားကြည့်ခဲ့သူအမျိုးသမီးတဦးက Border News Agency ကို ပြောပါတယ်။
သူမဟာ ပြီးခဲ့တဲ့ဇူလိုင်လ ၁၈ ရက်နေ့က သူမသူငယ်ချင်းတွေနဲ့အတူ မြောင်ကိုသွားမယ့်အချိန်မှာ အမျိုးသားတဦးက ဆိုင်ကယ်နဲ့တင်ခေါ်သွားတာလို့ မြင်တွေ့လိုက်သူတွေက ဆိုကြပါတယ်။
အဲဒီနောက် သူမပျောက်ဆုံးနေတာဖြစ်ပြီး သူမကို ဇူလိုင်လ ၂၃ ရက်၊ ဒီနေ့မှသာရုပ်အလောင်းကို ပြန်တွေ့တာမို့ အာရက္ခပြည်သူ့တော်လှန်ရေးအစိုးရရဲ့ မှုခင်းရဲတပ်ဖွဲ့ကစစ်ဆေးနေတယ်လို့ ဆိုကြပါတယ်။
အဲဒီလိုဖမ်းဆီးမုဒိန်းကျင့်သတ်ဖြတ်အလောင်းဖျောက်ခံနေကြရတာတွေဟာ အမျိုးသမီးတွေကို ဘေးကင်းလုံခြုံမှုကင်းမဲ့စေပြီး အာရက္ခပြည်သူ့တော်လှန်ရေးအစိုးရရဲ့ တရားဥပဒေစိုးမိုးရေးနဲ့ ပြည်သူ့လုံခြုံရေးအပေါ် ပြည်သူလူထုမေးခွန်းထုတ်နေကြပြီလို့ ဆိုကြပါတယ်။
“တပ်တော်ကို ဂရုမစိုက်လို့လုပ်တာပါ။အမျိုးသမီးတွေကို တန်ဖိုးမထားလို့မဒိန်းကျင့်တာပါ။ တရားခံကို အမြန်ဆုံးဖော်ထုတ်ပြီးထိထိရောက်ရောက် အရေးပြပေးစေချင်ပါတယ်။ မဟုတ်ရင်အမျိုးသမီးတွေ ထပ်ခံနေကြရဦးမှာပါ။” လို့ ပုဏ္ဏားကျွန်းမြို့နယ်မှ စစ်ဘေးရှောင်အမျိုးသမီးတဦးက Border News Agency ကို ပြောပါတယ်။
အဲဒီအမျိုးသမီးငယ်ကို ဆိုင်ကယ်နဲ့တင်ခေါ်သွားသူဟာ ပုဏ္ဏားကျွန်းမြို့နယ်၊ ပသောရွာမှ သဲတော်ကျေးရွာအနီးမှာ စ စ်ဘေးရှောင်နေတဲ့ ကိုမောင်တင်ဝင်းဖြစ်တယ်လို့ ပုဏ္ဏားကျွန်းဒေသခံတွေက အတည်ပြုပြောကြပါတယ်။
အဲဒီအမှုကို တရားဥပဒေစိုးမိုးရေးနဲ့ ပြည်သူ့လုံခြုံရေးဌာနက စုံစမ်းနေပေမယ့်တရားခံကို မဖမ်းမိသေးဘူးလို့ ဆိုကြပါတယ်။
အဲဒီပြစ်မှုကျူးလွန်သူတရားခံဟာ အာရက္ခတပ်တော်ထိန်းချုပ်နယ်မြေထဲမှာသာနေထိုင်သူမို့ အမြန်ဆုံးစုံစမ်းဖော်ထုတ် ဖမ်းဆီးအရေးယူပေးကြဖို့ ပြည်သူတွေတောင်းဆိုနေကြပါတယ်။
