Border News Agency
နီပေါ၊ ဩဂုတ် ၂၈။
ဟိမဝန္တာတောင်တန်းဒေသ နီပေါနိုင်ငံနဲ့ တိဘက်နယ်စပ်မှာ ရုတ်တရက်ရေကြီးမှုကြောင့် သေဆုံးသူအရေအတွက်ဟာ ၃၅၉ ဦးထိ မြင့်တက်လာခဲ့ပြီး လူ ၁,၃၀၀ ကျော်ပျောက်ဆုံးနေဆဲလို့ နိုင်ငံတကာသတင်းတွေက ဖော်ပြပါတယ်။
သြဂုတ်လ ၂၆ ရက်နေ့က တိဘက်ဒေသ Lhende မြစ်အထက်ပိုင်းမှာ ရေခဲနဲ့ ကျောက်တုံးတွေပြိုကျပြီး မြစ်ရေကိုပိတ်ဆို့သွားခဲ့ကာ အဲဒီမှတဆင့် ရေလှိုင်းကြီးတွေ ရုတ်တရက်လျှံကျလာတာကြောင့် နီပေါနိုင်ငံ ရာဆူဝါခရိုင်အတွင်းရှိ အိမ်ခြေတွေ၊ရေအားလျှပ်စစ်စက်ရုံတွေနဲ့ နယ်စပ်အခြေခံအဆောက်အအုံတွေ ပျက်စီးသွားခဲ့တာပါ။
အဲဒီရေကြီးမှုကြောင့် တံတား ၁၉ စင်းနဲ့ လမ်း ၄၀ ကီလိုမီတာခန့် ပျက်စီးသွားခဲ့တာကြောင့် ကယ်ဆယ်ရေးအဖွဲ့တွေ ရောက်ရှိဖို့ခက်ခဲနေပြီး သေဆုံးသူအရေအတွက်လည်း ထပ်မံမြင့်တက်လာနိုင်တယ်လို့ နီပေါရဲတပ်ဖွဲ့ကဆိုပါတယ်။
ဆိုင်းပရူးဗေစီရွာအပါအဝင် ရာဆူဝါ၊ နူဝါကုတ်နက် ဓါဒင်းဒေသတွေမှာ ရေထုနဲ့ ရွှံ့နွံတွေလွှမ်းမိုးသွားခဲ့ပြီး သေဆုံးသူတွေရဲ့ရုပ်အလောင်းတွေကို တောင်ပိုင်းဒေသအထိမျောပါသွားရာမှ ပြန်လည်ဆယ်ယူရရှိခဲ့တာပါ။
အဲဒီဖြစ်စဉ်မှာ ပြင်းအား ၄.၄ အဆင့်ရှိ ငလျင်ကြောင့်ဖြစ်ရတယ်လို့ ကနဦးသတင်းထွက်ခဲ့ပေမယ့် ရေခဲနဲ့ မြေသားတွေပြိုကျဆင်းမှုရဲ့ ပြင်းအားကြောင့် ငလျင်လိုမျိုးတုန်ခါမှုဖြစ်ပေါ်ခဲ့တာလို့ အမေရိကန် ဘူမိဗေဒစစ်တမ်းအဖွဲ့ (USGS) က အတည်ပြုထားပါတယ်။
