Border News Agency
ထားဝယ်၊ ဩဂုတ် ၃၀။
တနင်္သာရီတိုင်း၊ ထားဝယ်မြို့နယ်မှာ တော်လှန်ရေးတပ်တွေတိုက်ခိုက်လို့ အာဏာသိမ်းစစ်သား ၁၅ ဦးသေဆုံးသွားတယ်လို့ ဓဝယ်အမျိုးသားလွတ်မြောက်ရေးတပ်တော်မှ ဩဂုတ်လ ၂၉ရက်၊မနေ့က ထုတ်ပြန်ပါတယ်။
ရေး-ထားဝယ်အမှတ် ၈ လမ်းမကြီးမှာ ထားဝယ်ရေနက်ဆိပ်ကမ်းလုံခြုံရေးအကြောင်းပြ စစ်ကြောင်းထိုးလာတဲ့ စစ်တပ်စစ်ကြောင်းကို ဩဂုတ် ၂၉ ရက်၊ မနက် ၆ နာရီအချိန်ခန့်မှာ DNLAနဲ့ ပူးပေါင်းတပ်တွေက ကြားဖြတ်တိုက်ခိုက်ခဲ့တာလို့ဆိုပါတယ်။
အဲဒီလိုကြားဖြတ်တိုက်ခိုက်ခဲ့တာကြောင့် အာဏာသိမ်းစစ်တပ်တပ်ဖွဲ့ဝင် ၁၅ ဦးသေဆုံးသွားခဲ့ပြီး အများအပြားဒဏ်ရာရခဲ့တယ်လို့ ဆိုပါတယ်။
တိုက်ခိုက်မှုအတွင်း MA1 ၆ လက်၊ MA3 ၂ လက်၊ ကျည်ဘောက် ၁၁ ခုနဲ့ ကျည် ၂၀၀ တောင့်တို့ကိုလည်း သိမ်းဆည်းရမိခဲ့တယ်လို့ ဆိုပါတယ်။
အဲဒီတိုက်ခိုက်မှုကို ဓဝယ်အမျိုးသားလွတ်မြောက်ရေးတပ်တော် DNLA ရဲ့ ဒူရကစစ်ကြောင်း၊ ထားဝယ်ပြည်သူ့လွတ်မြောက်ရေးတပ်၊ဘီလုံးပြောက်ကျားတပ်ဖွဲ့၊ ထားဝယ်အရှေ့တောပြည်သူ့ကာကွယ်ရေးအင်အားစု၊ ကိုမြတ်သူအဖွဲ့နဲ့ ထားဝယ်ခရိုင် ပြည်သူ့ကာကွယ်ရေးတပ်ဦးတို့က ပူးပေါင်းလုပ်ဆောင်ခဲ့တယ်လို့ ဆိုပါတယ်။
