Border News Aency
မလေးရှား၊ သြဂုတ် ၃၀။
မလေးရှားနိုင်ငံ၊ ဂျိုဟိုးပြည်နယ်၊ ကူလိုင်းဒေသရှိ စီးပွားရေးလုပ်ငန်းတွေနဲ့နေအိမ်တွေကိုပစ်မှတ်ထားပြီး သြဂုတ်လ ၂၈ ရက်နေ့က မလေးရှားလူဝင်မှုကြီးကြပ်ရေးဦးစီးဌာနမှ Ops Mahir, Ops Selera, Ops Kutip, Ops Minyak, Ops Belanja နဲ့ Ops Sapu စတဲ့စစ်ဆင်ရေးတွေကို လုပ်ဆောင်ခဲ့ပါတယ်။
အဲဒီစစ်ဆင်ရေးကို သြဂုတ်လ ၂၈ ရက်၊ နေ့လည် ၂နာရီ ၃၀ မိနစ်အချိန်ခန့်က ဂျိုဟိုးပြည်နယ်မှ လဝကအရာရှိတွေကနေရာအနှံ့အပြားကို ဝင်ရောက်စီးနင်းပြီး ဥပဒေချိုးဖောက်တယ်လို့မသင်္ကာရတဲ့ နိုင်ငံခြားသားတွေကို ရှာဖွေဖမ်းဆီးခဲ့ပါတယ်။
စစ်ဆင်ရေးမှာ အီလက်ထရောနစ် စက်ရုံ၊ ကားရေဆေးခုံ၊ အလုပ်သမားတွေနေထိုင်တဲ့ ဆိုင်ခန်းတွေနဲ့ စားသောက်ဆိုင်တွေကို စစ်ဆေးခဲ့ပြီးစက်ရုံမှ HR အရာရှိ ဒေသခံ မလေးရှားနိုင်ငံသားနှစ်ဦးကို ဖမ်းဆီးခဲ့ပါတယ်။
နိုင်ငံခြားသားတွေရဲ့နေထိုင်ခွင့်အခြေအနေနဲ့ ခရီးသွားစာရွက်စာတမ်းတွေကိုစစ်ဆေးခဲ့သလို သတ်မှတ်ထားတဲ့လဝကဥပဒေတွေနဲ့ကိုက်ညီမှုရှိမရှိ စစ်ဆေးခဲ့ပြီး အလုပ်ခန့်ထားမှု အခြေအနေ၊ နေထိုင်ခွင့်လက်မှတ် (Pass) နဲ့ ပါမစ်တွေအဓိကထား စစ်ဆေးခဲ့ပါတယ်။
ဖမ်းဆီးရာမှာ အသက် ၂၄ နှစ်မှ ၄၅ နှစ်အတွင်းရှိကြတဲ့ နိုင်ငံခြားသား စုစုပေါင်း ၆၉ ဦးကို လဝကပြစ်မှုအမျိုးမျိုးနဲ့ဖမ်းဆီးခဲ့ပြီး အဲဒီအထဲမှာ ပါကစ္စတန် အမျိုးသား ၅ ဦး၊ အင်ဒိုနီးရှား အမျိုးသား ၃ ဦး၊ အိန္ဒိယ အမျိုးသား ၄ ဦး၊ မြန်မာအမျိုးသား ၁၅ ဦး၊ နီပေါအမျိုးသား ၁၃ ဦး၊ ဘင်္ဂလားဒေ့ရှ်အမျိုးသား ၇ ဦး၊ အင်ဒိုနီးရှားအမျိုးသမီး ၅ ဦးနဲ့ မြန်မာအမျိုးသမီး ၁၇ ဦး ဖမ်းဆီးခဲ့ပါတယ်။
ဖမ်းဆီးခံရသူများအားလုံးဟာ ၁၉၅၉/၆၃ လဝကအက်ဥပဒေနဲ့ ၁၉၆၃ လဝကစည်းမျဉ်းများအရ ပြစ်မှုကျူးလွန်တယ်လို့ မသင်္ကာခံရပြီး ဗီဇာစည်းကမ်းတွေကို ဖောက်ဖျက်တာ သို့မဟုတ် နိုင်ငံအတွင်းတရားမဝင်နေထိုင်တဲ့ နိုင်ငံခြားသားကိုမဆို လုံးဝညှိနှိုင်းမှုမရှိဘဲပြင်းထန်စွာ အရေးယူသွားမယ်လို့ ဆိုပါတယ်။
တရားမဝင်နိုင်ငံခြားသားတွေ (PATI) ကို ကာကွယ်ပေးထားတာ၊ အလုပ်ခန့်ထားတာ သို့မဟုတ် ပူးပေါင်းကြံစည်တာတွေပြုလုပ်တယ်လို့စစ်ဆေးတွေ့ရှိရတဲ့ အလုပ်ရှင်တွေနဲ့ သက်ဆိုင်ရာပုဂ္ဂိုလ်တွေကိုလည်း အလားတူအရေးယူသွားမယ်လို့ လို့ ဂျိုဟိုးပြည်နယ် လဝကမှသတိပေးထားပါတယ်။
