Border News Agency
ကစယ်ဒို၊ ဩဂုတ် ၃၀။
တနင်္သာရီတိုင်း၊ မြိတ်ထားဝယ်ခရိုင်၊ ကစယ်ဒိုမြို့နယ်မှာ တော်လှန်ရေးတပ်တွေတိုက်ခိုက်လို့ အာဏာသိမ်းစစ်သား ၁၂ ဦးသေဆုံးသွားတယ်လို့ ကရင်အမျိုးသားအစည်းအရုံးမှ ဩဂုတ်လ ၃၀ရက်၊ ဒီနေ့ ထုတ်ပြန်ပါတယ်။
အဲဒီကစယ်ဒိုမြို့နယ်၊ မောင်မယ်ရှောင်ကျေးရွာအနီးမှာ ဩဂုတ်လ ၂၉ ရက်၊ မနက် ၆ နာရီ ၃၀မိနစ်အချိန်ခန့်က စစ်ကြောင်းထိုးဝင်ရောက်လာတဲ့ အာဏာသိမ်းစစ်တပ်ကို ကရင်အမျိုးသားလွတ်မြောက်ရေးတပ်မတော်နဲ့ပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့တာလို့ ဆိုပါတယ်။
အဲဒီလိုကြားဖြတ်တိုက်ခိုက်ခဲ့တာကြောင့် အာဏာသိမ်းစစ်တပ်တပ်ဖွဲ့ဝင် ၁၂ ဦးသေဆုံးသွားခဲ့ပြီး MA-1 ၆လက်၊ MA-3 ၂လက် နဲ့ လက်နက်ခဲယမ်းအချို့သိမ်းဆည်းရမိခဲ့တယ်လို့ ဆိုပါတယ်။
တိုက်ခိုက်မှုကို KNLA ကရင်အမျိုးသားလွတ်မြောက်ရေးတပ်မတော် တပ်မဟာ ၄ ၊ တပ်ရင်း ၁၂ တပ်ခွဲ ၅၊ တပ်ရင်း ၁၀ တပ်ခွဲ ၄နဲ့ DNLA ထားဝယ်အမျိုးသားလွတ်မြောက်ရေးတပ်မတော် ပူးပေါင်းတော်လှန်ရေးတပ်ဖွဲ့တွေက လုပ်ဆောင်ခဲ့တယ်လို့ ဆိုပါတယ်။
