Border News Agency
မြောက်ဦး၊ နိုဝင်ဘာ ၇။
သက္ကမအမျိုးသားရေးဦးဆောင်လှုပ်ရှားသူ ဆရာဦးဦးလှကျော်ဟာ ပြီးခဲ့တဲ့ နိုဝင်ဘာလ ၅ ရက်၊ညနေက မလေးရှားနိုင်ငံမှာ မတော်တဆမှုတခုကြောင့် ရုတ်တရက် ကွယ်လွန်သွားခဲ့ပါတယ်။
သူ့ကို ၁၉၈၃ ခုနှစ်၊ဇွန်လ ၁၂ ရက်နေ့မှာ အာရက္ခဒေသ၊မြောက်ဦးမြို့နယ်၊နန်းကျားကျေးရွာမှာမွေးဖွားခဲ့ပြီး မိသားစုစားဝတ်နေရေးအတွက် မလေးရှားနိုင်ငံ ပူးချောင်းမှာ အလုပ်လုပ်ကိုင်နေစဉ် ခုလိုကွယ်လွန်သွားခဲ့တာ ဖြစ်ပါတယ်။
“ဆရာလှကျော် ဆုံးပါးတာဟာ လူမျိုးအတွက် တကယ့်ဆုံးရှုံးမှုတခုပါ။ လူငယ်တွေကို ဘေးကနေ ပံ့ပိုးပေးပြီး အမျိုးသားရေးအတွက် အားကိုးရတဲ့သူတယောက် ဖြစ်ပါတယ်။”လို့ သက္ကမဌာနေတိုင်းရင်းသားလူငယ်များအသင်း ဥက္ကဋ္ဌ ကိုမောင်မောင်အေးက ပြောပါတယ်။
ဆရာဦးဦးလှကျော်ဟာ သက္ကမဌာနေတိုင်းရင်းသားလူငယ်များအသင်း (CIYA)၊ Daingnet (Chakma) Organization (DO) နဲ့တခြားလူမှုရေးအဖွဲ့အစည်းတွေ ပေါ်ပေါက်လာဖို့နဲ့ ခိုင်မာစွာ ရပ်တည်နိုင်ဖို့အတွက် အမျိုးသားရေးစိတ်နဲ့ စွမ်းစွမ်းတမံ ဆောင်ရွက်ခဲ့သူဖြစ်ပါတယ်။
အာရက္ခဒေသနေရာဒေသအသီးသီးမှာ ကွဲပြားနေထိုင်နေကြတဲ့ သက္ကမလူငယ်တွေကြား ချိတ်ဆက်မှုတွေ ရရှိစေဖို့နဲ့ အမျိုးသားရေးကိစ္စတွေမှာ တာဝန်ကျေပွန်ခဲ့သူဖြစ်တာကြောင့် သူကွယ်လွန်သွားတာဟာ သက္ကမလူထုတရပ်လုံးအတွက် ကြီးမားတဲ့ဆုံးရှုံးမှုတခုဖြစ်တယ်လို့ဆိုကြပါတယ်။
“ဆရာလှနဲ့က ၂၀၁၈ ကတည်းက ရင်းနှီးခဲ့ကြတာပါ။ ကျမ ဒီမှာ ဒီပလိုမာတက်နေတုန်းကလည်း သူ့ဆီက အကူအညီတွေ၊ အားပေးစကားတွေကို ညီမအရင်းလို သဘောထားပြီး ကူညီပေးခဲ့ပါတယ်။”လို့ ချင်းပြည်၊ဟားခါးမှာ ပညာသင်ကြားနေသူ မမိုးချေက ပြောပါတယ်။
သက္ကမလူမျိုးတွေအတွက် ပညာရေး၊လူမှုကယ်ဆယ်ရေးနဲ့အာရက္ခဒေသတွင်း ဒုက္ခရောက်နေသူတွေကို နိုင်ရာဘက်က ပံ့ပိုးပေးခဲ့တဲ့ ဆရာဦးဦးလှကျော် ကွယ်လွန်သွားတာနဲ့ ပတ်သက်ပြီး ဒေသခံတွေနဲ့ အဖွဲ့အစည်းအသီးသီးက လေးနက်စွာ ဝမ်းနည်းကြောင်း ထုတ်ဖော်ပြောဆိုထားကြပါတယ်။
