Border News Agency
ပလက်ဝ၊ နိုဝင်ဘာ ၁၈။
အာရက္ခတပ်တော်(AA)ထိန်းချုပ်ထားတဲ့ ပလက်ဝမြို့နယ်၊ သူဌေးကုန်းကျေးရွာအနီးဝန်းကျင်ကို နိုဝင်ဘာလ ၁၄ ရက်နေ့က အာဏာသိမ်းစစ်တပ်က တိုက်လေယာဉ် လေးစီး၊ Y12 တစီးနဲ့ ည ၇ နာရီ ၅၇ မိနစ်အချိန်ကနေ ၉ နာရီ ၁၅ မိနစ်အချိန်ထိ တနာရီကျော်ကြာ အပြင်းအထန်လေကြောင်းတိုက်ခိုက်ခဲ့ပါတယ်။
အဲဒီလို တိုက်ခိုက်ရာမှာ ပေါင် ၅၀၀၊ ၃၀၀၊ ၂၀၀၊ Rocket နဲ့ Drop Bomb အပါအဝင် စုစုပေါင်း ဗုံးအလုံးရေ ငါးဆယ်နီးပါးခန့်ကို အာဏာသိမ်းစစ်တပ်က မရပ်မနားတိုက်ခိုက်ခဲ့တာဖြစ်ပါတယ်။
အဲဒီလိုလေကြောင်းတိုက်ခိုက်မှုအတွင်း ခေတ္တစစ်ဘေးရှောင်နေကြတဲ့ အပြစ်မဲ့ အရပ်သားပြည်သူတွေ ထိခိုက်သေဆုံးခဲ့ရပြီး သုံးနှစ်အရွယ်ကလေးငယ် တဦး၊ ငါးလ ကိုယ်ဝန်ဆောင် အမျိုးသမီးတဦးနဲ့ နောက်ထပ် ကျား ခြောက်ဦး၊မ လေးဦး စုစုပေါင်း တဆယ့်နှစ်ဦးသေဆုံးခဲ့ရပါတယ်။
အဲဒီတိုက်ခိုက်မှုကြောင့်ပါပဲ အသေးစား၊ အလတ်စားနဲ့ အကြီးစား ထိခိုက်ဒဏ်ရာရရှိသူ ကျားဆယ့်တဦးနဲ့ မဆယ်ဦး စုစုပေါင်း နှစ်ဆယ့်တဦးဒဏ်ရာတွေရရှိခဲ့ကြပါတယ်။
အဲဒီအပြင် အဲဒီလေကြောင်းနဲ့ ဗုံးသီးနဲ့ ပစ်ခတ်တိုက်ခိုက်မှုတွေကြောင့် သူဌေးကုန်းကျေးရွာရှိလူနေအိမ်အများအပြားလည်း မီးလောင်ပျက်စီးဆုံးရှုံးခဲ့ရပါတယ်။








