Border News Agency
ထိုင်း၊မေ ၁၃။
ထိုင်းနိုင်ငံမူးယစ်ဆေးဝါးနှိမ်နင်းရေးအဖွဲ့ (PNSB)နဲ့ ပူးပေါင်းအဖွဲ့တွေဟာ မေလ ၁၂ ရက်နေ့က ဘန်ကောက်၊ရာသ်ဘူရီနယ်မြေ (Rat Burana) ရှိ စက်သုံးဆီဆိုင်တခုမှာ အိုက်စ် (Ice) ၃၀၀ ကီလို သယ်ဆောင်လာတဲ့ တရားခံ ၆ ဦးကို ဖမ်းဆီးလိုက်ပါတယ်။
အဲဒီမူးယစ်ဆေးတွေကို ဗန်ကားတစီးပေါ်မှာ လျှို့ဝှက်သိုဝှက် သယ်ဆောင်လာတာ ဖြစ်ပါတယ်။
အဲဒီဖမ်းမိတဲ့ တရားခံတွေဟာ နရသီဝပ် (Narathiwat) ခရိုင်ကဖြစ်ပြီး သူတို့ဟာ အာဏာပိုင်တွေ မရိပ်မိအောင် ဗန်ကားရဲ့ နံပါတ်ပြားတွေကိုလဲပြီး မူးယစ်ဆေးတွေကို တောင်ပိုင်းဒေသဆီ သယ်ဖို့ ကြိုးစားခဲ့တာပါ။
အာဏာပိုင်တွေဟာ သတင်းအရ မေလ ၁၀ ရက်နေ့ကတည်းက သူတို့နောက်ကို စောင့်ကြည့်ခြေရာခံခဲ့တာ ဖြစ်ပါတယ်။
မူးယစ်ဆေးတွေ ဖမ်းမိပြီးနောက် နရသီဝပ်ခရိုင်အတွင်းက တရားခံတွေရဲ့ နေအိမ် ၅ နေရာကို ဆက်လက်ရှာဖွေခဲ့ရာမှာ မြေကွက်နဲ့ အဆောက်အအုံတွေ၊အဝတ်လျှော်လုပ်ငန်းတွေ၊ ကားတွေ၊ ရတနာတွေနဲ့ တံဆိပ်ပါ ပစ္စည်းတွေကို တွေ့ရှိခဲ့ပါတယ်။
အဲဒီသိမ်းဆည်းရမိတဲ့ ပစ္စည်းစုစုပေါင်း တန်ဖိုးဟာ ဘတ် ၄၆ သန်းခန့် ရှိပါတယ်။
အာဏာပိုင်တွေရဲ့ စစ်ဆေးချက်အရ ဒီအိုက်စ်တွေကို ထိုင်းတောင်ပိုင်းဒေသကနေတဆင့် တတိယနိုင်ငံတခုဆီ ဆက်ပြီး ပို့ဆောင်ဖို့ ပြင်ဆင်ထားတာလို့ ယူဆရပါတယ်။
အဲဒီမူးယစ်ဆေးဝါး တိုက်ဖျက်ရေးအတွက် အစိုးရရဲ့ မူဝါဒအတိုင်း မူးယစ်ဂိုဏ်းတွေကို စနစ်တကျ အမြစ်ပြတ်အောင် လုပ်ဆောင်သွားမှာဖြစ်ပြီး ပါဝင်ပတ်သက်သူတွေရဲ့ ပိုင်ဆိုင်မှုတွေကိုလည်း ဆက်ပြီး သိမ်းဆည်းသွားမယ်လို့ PNSB က ပြောထားပါတယ်။
