Border News Agency
အမေရိကန်၊မေ ၁၃။
အမေရိကန်သမ္မတဒေါ်နယ်ထရန့်ဟာ တရုတ်သမ္မတရှီကျင့်ဖျင်နဲ့ အရေးကြီးတဲ့ ထိပ်သီးဆွေးနွေးပွဲ ပြုလုပ်ဖို့ မေလ ၁၃ ရက်၊ဒီနေ့ ည ၇ နာရီ ၅၀ မိနစ်မှာ တရုတ်နိုင်ငံ၊ပေကျင်းမြို့တော် အပြည်ပြည်ဆိုင်ရာ လေဆိပ်ကို ရောက်ရှိလာပြီ ဖြစ်ပါတယ်။
သမ္မတ ထရန့်ဟာ Air Force One လေယာဉ်ပေါ်ကနေ ဆင်းသက်လာချိန်မှာ တရုတ်ဂုဏ်ထူးဆောင် တပ်ဖွဲ့ဝင်တွေနဲ့အတူ အမေရိကန်နဲ့ တရုတ်အလံတွေကို ဝှေ့ယမ်းနှုတ်ဆက်နေတဲ့ တရုတ်ကျောင်းသားလေးတွေက နွေးနွေးထွေးထွေး ကြိုဆိုခဲ့ကြပါတယ်။
အခုခရီးစဉ်ဟာ ဆယ်စုနှစ်တခုအတွင်း အမေရိကန်သမ္မတတဦး တရုတ်နိုင်ငံကို ပထမဆုံးအကြိမ် လာရောက်တာဖြစ်ပြီး လေဆိပ်မှာ တရုတ်ဒုသမ္မတ ဟန်ကျန်း ကိုယ်တိုင် လာရောက်ကြိုဆိုခဲ့တာက တရုတ်ဘက်က ဒီခရီးစဉ်ကို ဘယ်လောက်အရေးထားသလဲဆိုတာ ပြသနေတာပါ။
သမ္မတ ထရန့်ဟာ ပေကျင်းမှာ ကြာသပတေးနဲ့ သောကြာနေ့တွေအထိ ကြာမြင့်မယ့် ဒီခရီးစဉ်အတွင်းမှာ အီရန်စစ်ပွဲကိစ္စကို အဓိကထား ဆွေးနွေးသွားဖို့ ရှိနေသလို အမေရိကန်ရဲ့ ထိပ်တန်းစီးပွားရေးလုပ်ငန်းရှင်ကြီးတွေ ဖြစ်ကြတဲ့ Elon Musk၊ Tim Cook နဲ့ Jensen Huang တို့လည်း အတူပါဝင်လာကြပါတယ်။
ထရန့်က တရုတ်နိုင်ငံကို အမေရိကန် စီးပွားရေးလုပ်ငန်းတွေအတွက် ပိုမို ဖွင့်လှစ်ပေးဖို့ သမ္မတ ရှီကျင့်ဖျင်ကို တောင်းဆိုသွားမယ်လို့ ပြောဆိုထားပါတယ်။
ဒါ့အပြင် ထိုင်ဝမ်ကို လက်နက်ရောင်းချမှု၊ ကုန်သွယ်ရေးနဲ့ ရင်းနှီးမြှုပ်နှံမှု၊ ပြီးတော့ AI နည်းပညာရဲ့ အန္တရာယ်တွေနဲ့ ပတ်သက်လို့လည်း နှစ်နိုင်ငံ ခေါင်းဆောင်တွေကြား အသေးစိတ် ဆွေးနွေးသွားဖို့ ရှိနေပါတယ်။
